"पहिचान सहितया सांस्कृतिक व ऐतिहासिक शहरया विकास" - प्रेमकृष्ण महर्जन
ने. सं. ११३८ थिंलाथ्व त्रयोदसि (डिसेम्वर १, २०१७) यल
देयया न्हापाँगु प्रतिनिधिसभा व प्रदेशसभाया निर्वाचन वइगु बिहिवाः मंसीर २१ गते जुइत्यंगु दु । प्रदेश नम्वर ३ या यलया निर्वाचन क्षेत्र नम्वर २ (क) या नेपाली काँग्रेसपाखें प्रदेशसभाया उम्मेदवार जुयादीम्ह भाजु प्रेमकृष्ण महर्जनजुलिसे  संवाददाता राजेश बज्राचार्यं  यानादीगु खँल्हाबल्हाया संक्षेप न्ह्यब्वया ः
 
 
थुगुसीया प्रदेशसभा निर्वाचनय् छिगु उम्मेदवारी छाय आवश्यक जुल?
 
प्रेमकृष्ण महर्जनः  संविधानपाखें निश्चित याःगु प्रादेशिक तहया कानून निर्माण यायेगु जिम्मेवारी वःगु दु । प्रदेश तहया प्रहरी प्रशासन, निजामती सेवा गठन, भाषा, संस्कृतिया संरक्षणय् प्रदेश सरकारं महत्वपूर्ण भूमिका यायेमाःगु दु । प्रादेशिक सरकारपाखें स्वशासनया लोकतान्त्रिक अभ्यास यायेत जनतानापं जानां ज्याः यायेगु महत्वपूर्ण जिम्मेवारी कायेगु लागि हे जिगु उममेदवारी खः । क्षेत्रगत एजेण्डाया सवालय् नेपाली काँग्रेसया घोषणापत्र झीगु थाय् ल्वयेक कार्यान्वयन याकेगु नितिं जिगु राजनैतिक व सामाजिक अनुभवयात नीतिगत तहलय् थ्यंका आर्थिक विकासया आधार दयेकेत जिगु उम्मेदवारी खः ।
 
चुनाव प्रचारयानितिं घरदैलो अभियानया क्रमय् छेँ छेँ, त्वाः त्वालय् झायादीबलय् स्थानीयपिनिगु मू समस्या छु तायेकादिया ? 
 
प्रेमकृष्ण महर्जनः क्षेत्र नं २ या मुख्य समस्या धैगु थनया ऐतिहासिक थाय्बाय् व संस्कृतियात संरक्षण यायेमफुत, थुकियात आर्थिक विकासनापं स्वायेमफुत धैगु हे खनेदु । मेखेर, झीगु सम्पदा जक मखु तःभूखाय् लिपा  व्यवस्थित विकासयात तिव्रता विइमाःगु अपेक्षा नं खनेदु । भाषा, संस्कृतियात लिच्व मलाइकथंया विकास सुना याइ धैगु चिन्ता खनेदु । उद्योग व्यवसायमैत्री कानूनया प्रत्याभूति उद्यमीपिन्स यायेफूगु खनेमदु । मेगु समस्याकथं नेवाःतयेगु राजनीतिक चेतनाय् विकास जूगु खनेदसातवि लोकतान्त्रिक अभ्यास व तथ्यांकया आधारय् विकासया अवधारणा न्ह्यब्वयेगु नापं प्रतिस्पर्धाया अभाव अझं व्याप्त खनेदु । थुकीया दसु जनयुद्धया लिच्वयात शान्तिपूर्ण निकासपाखे न्ह्यज्याना वःगु निर्वाचनयात लोकतान्त्रिक अभ्यासया उत्कृष्टता खः धैगु मिखाँ स्वयेगुसिबें वाम गठबन्धनपाखें विकास जुइ कि अधिनायकत्व वइगु खः धैगु आशंका उप्वः हाः कयाच्वंगु अवस्था क्यनाच्वंगु दु । नेपाःयात एकीकृत यायेकथंया राष्ट्रियतासहित लोकतान्त्रिक अभ्यास, आर्थिक विकासया मुद्दा पाखें जक झिपिं व्यवहारिक समाजवादय् थ्यंकेफइ धैगु बुलुहँु चायेका हःगु अवस्था दु ।
 
प्रदेश ३ य् विद्यमान गरिबी, अशिक्षा , बेरोजगारी व थीथी समुदाय दथुया आर्थिक व सामाजिक पुँजीइ असमान वितरण मुख्य चुनौती खः । भौगोलिक स्थितिया हुनिं थनया तामाङ वाहुल्य दुगु हिमाली क्षेत्रय् विकास यायेफुगु मदुसा शहरी क्षेत्र नं उचित व्यवस्थापनया अभावय् अस्तव्यस्त खनेदु । 
 
क्षेत्र नं २ (ख) या खँः ल्हायेगु खःसा देय्न्यंकनं अवसरयालागि थन वइपिनिगु ल्या उप्वयाच्वंगु खनेदु तर थनया पूर्वाधार विकास थुगु आवश्यकताकथं दयेकेफुगु मदुनि । झीगु प्रदेशय् मेलम्ची निसें तःतधंगु खानेपानी आयोजना निर्माणरत जुयाच्वंगु दुसातवि त्वनेगु लःया अभाव २१.१% जनसंख्या भोगेयानाच्वंगु दु । आधारभूत शिक्षा, स्वास्थ्य सुविधा सहित शहरीकरणया लागि थनया सांस्कृतिक व प्राकृतिक सम्पदाया विकासपाखें पर्यटनयात मुख्य आधार दयेकेगु व थुकिइं हे आर्थिक समृद्धियात बः बिइगु प्रदेशया मुख्य चुनौती खनेदु । थुपिं समस्यायात ज्यंकेगुनितिं नेपाली काँग्रेसया जि चुनावय् न्ह्यज्यानागु नं खः ।
 
प्रदेशसभा निर्वाचनय् विजयी जुयादिलधासा छिगु प्रमुख प्राथमिकता छुकिइ जुइ?
 
प्रेमकृष्ण महर्जनः क्षेत्रगत रुपं झीगु भाषा, संस्कृतियात पर्यटन विकासया पूर्वाधार दयेकेगुपाखे जि केन्द्रित जुइगु जुइ । पर्यटनया पूर्वाधारकथं न्हापां भूखाचं क्षतिग्रस्त सम्पदाया पुननिर्माणय् तीव्रता हयेगु नापं मू सतकया गुणस्तर सुधार व त्वाःत्वालय् दुगु लँपुयात ल्होंत सिइका थनया वातावरणीय विकासय् न्ह्यज्यायेगु जुइ । मूर्त अमूर्त सम्पदा हे पर्यटक आकर्षणया उपाय खः धैगु ध्वाथुइका नेपाली काँग्रेसया घोषणापत्र अनुसारया “धार्मिक स्थल पूर्वाधार विकास प्राधिकरण”, औद्योगिक पुनर्जागरण अभियान अन्तर्गत एकीकृत उद्योग वाणिज्य मन्त्रालय व स्वायत्त राष्ट्रिय व्यापार प्राधिकरण स्थापना, “युवा उद्यम चुनौती कोष” यात प्रादेशिक तहलय् नीतिगत व्यवस्था याना विशेष पहिचान सहितया सांस्कृतिक व ऐतिहासिक शहरया विकास यायेगु जुइ ।