पाकिस्तानया सूचनामन्त्रीयात पदं चीकल
लहनान्यूज सम्वाददाता | कौलागा चतुर्दशि ११३६ (अक्टोबर २९ २०१६)
पाकिस्तानया प्रधानमंत्री नवाज़ शरीफं थः सूचनामंत्री परवेज़ रशीदयात पदं चीकाब्यूगु दु ।
पाकिस्तानया प्रधानमंत्री ज्याकुथिं सूचनामन्त्री रशीदयात पदं चीकूगु खँया पुष्टि यासें आःया नितिं वयकःयात पद त्वःतेत उजं ब्यूगु धाःगु दु । ६ अक्टोबरय् राष्ट्रीय सुरक्षा समितिया मुँज्या सम्बन्धि बुखँ पिदंगुलिं राष्ट्रीय सुरक्षा खतराय् लाःगु प्रधानमंत्री ज्याकुथिं धाःगु खः ।
अक्टोबर ६ स पाकिस्तानी पत्रिका डनं मुँज्याय् सेना व सरकारया दथुइ मतभेद न्ह्यःने वःगु व सरकारं सेनाया अफ़सरतयत ब्वः ब्यूगु धइगु बुखँ छापे याःगु खः । व धुंकाः डनया पत्रकार सिरिल अलमीदायात विदेश वनेगुलिइ रोक तयाब्यूगु खः ।
आःतक्कया अनुसन्धानय् थुगु घटना सूचनामंत्रीया हुनिं जूगु खनेदुगु बिबिसिया बुखँय् न्ह्यथनातःगु दु ।
सरकारं आईएसआई, एमआई व आईबीया वरिष्ठ अधिकारीत दुथ्याःइगु छगू जाँच समिति गठन याःगु दु । समितिं थुगु घटनाया दोषियात मालेगु ज्या याइ ।
सरकारं सेनाया दबाबय् थुगु निर्णय काःगु धयाच्वंगु दु । बुखँ पिदंगु कन्हयकुन्हु हे पाकिस्तानी सेनाया प्रमुख जनरल राहील शरीफं प्रधानमंत्री शरीफ़यात नापलानाःथ्व राष्ट्रीय सुरक्षाया उल्लंघनया खँ खःगु व थुकियात गंभीरतापूर्वक कायेमाःगु धाःगु खः ।
थुगु उहलं सरकार सेनाया दबाबय् दुगु स्पष्ट जूगु टिप्पणी विश्लेषकतयगु दु । मेखे हाकनं छुं विश्लेषकतयसं सरकारं जाँच याकाः पारदर्शितालिसें थःगु ज्या यानाच्वंगु टिप्पणी नं याःगु दु ।
Categorized in अन्तर्राष्ट्रिय
