पाकिस्तानय् रोनाल्डिन्हो व गिग्स
लहनान्युज | दिला गा तृतिया ११३७ ( जुलाई १२ २०१७ )
रोनाल्डिन्हो व रायन गिग्सलिसेंया अन्तर्राष्ट्रिय कासामितय्गु पुचः प्रदर्शनी फुटबल कासा म्हितेगु नितिं पाकिस्तानय् थ्यनाच्वंगु दु ।
पाकिस्तानय् क्रिकेट कासा तसकं लोकंह्वाः । तर थौंकन्हय् प्रिमियर लिग, स्पेनी लिगया हुनिं पाकिस्तानी ल्याय्म्हतय्के फुटबल कासाया क्रेज उलि हे दु । अथेखःसां पाकिस्तानय् अन्तर्राष्ट्रिय कासा धाःसा तसकं हे म्हो जक जुइगु याः ।
सन् २००९स श्रीलङ्काया राष्ट्रिय क्रिकेट टिम च्वना वनाच्वंगु बस लाहोरय् आतङ्कवादीतय्सं आक्रमण याय्धुंकाः पाकिस्तानय् तःधंगु विदेशी टिमं भ्रमण याःगु मदुनि ।
अन्तर्राष्ट्रिय कासामितय्गु आगमनं पाकिस्तानय् फुटबल कासाया विकासय् तःधंगु तिबः जूवनीगु विश्वास ग्वसाः खलःया दु ।
नेदरल्याण्ड्सया जर्ज वोयटेङ, फ्रान्सया पुलांपिं कासामिपिं रोबर्ट पिरेज व निकोलस एनेल्का, इङ्गल्याण्डया पुलांम्ह गोलरक्षक डेभिड जेम्स व पोर्चुगलया लुइस बोआ निजी विमानपाखें इस्लामाबाद वःगु खः ।
फिफा वरियताया धलखय् २००गू थासय् लानाच्वंगु पाकिस्तानय् कासामिपिनिगु थुगु भ्रमणपाखें फुटबल कासा प्रबद्र्धन जुइगु विश्वास कयातःगु दु ।
