पाकिस्तान विरुद्धया क्रिकेट धेंधेंबल्लाय् ४५गू रनं इंग्ल्याण्ड त्यात
दिल्लाथ्व दशमी ११४१,साउन ४ सोमवाः
पाकिस्तान विरुद्धया निगूगु ट्वेन्टी ट्वेन्टी क्रिकेट धेंधेंबल्लाय् इंग्ल्याण्ड ४५गू रनं त्यागु दु ।
इंग्ल्याण्डया हेडिङ्लेय् वंगु चान्हय् जूगु कासाय् टस बुना न्हापा व्याटिङ याःगु घरेलु टोली १९गू ओभर ५गः बलय् २सः रन दयेका अलआउट जुल । उमिगु नितिं कप्तान जोस बट्लरं दक्वःलय् आपा ५९गू रन मुंगु खः ।
बलिङपाखे पाकिस्तानया मोहोमद हस्नैनं ३ गू विकेट काल । लिसःलय् २सः व १गू रनया आज्जु लिफ्यागु पाकिस्तानं २०गू ओभरय् ९ गू विकेट तंका सच्छि व ५५गू रन जक दयेकेत ताःलात ।
पाकिस्तानया मोहोमद रिजवानं ३७गू रन लिसें शदाब खानं अविजित ३६गू रन दयेकल । पाकिस्तानयात याउँक कःघायेत इंग्ल्याण्डया सकिब महमुदं ३गू विकेट काःगु खः ।
कासा त्यागु लिसें इंग्ल्याण्डं ३गू कासाया टी–ट्वेन्टी श्रृंखलाय् १गू–१गूया ज्वलिन्ज्वः याःगु दु । श्रृंखलाया ३गूगु व लिपांगु कासा कन्हय् ओल्ड ट्राफोर्डय् जुइत्यंगु दु ।
Categorized in कासा
