पाकिस्तान विरुद्धया न्हापांगु ओडिआई इंग्ल्याण्डयात
बछलागा पञ्चमी, ११४१, असार २५ शुक्रबाः
पाकिस्तान विरुद्धया न्हापांगु एक दिवसिय क्रिकेट म्याच इंग्ल्याण्डं ९ गू विकटं त्याकुगु दु ।
वेल्सया कार्डीफय् वंगु चान्हय् जूगु कासाय् इंग्ल्यान्डया ल्याम्ह टोलीं शानदार ब्वज्या याःगु खः । नियमित टोलीया ९ म्ह कासामिइ कोरोना भाइरसया संक्रमण पुष्टि जुइधुंक म्हिगःया कासाया नितिं इंग्ल्याण्डं पूवंक न्हूगु टोली घोषणा याःगु खः ।
टोलीया ११म्ह मध्ये ५ म्ह कासामिं इंग्लीश राष्ट्रिय टोलीया नितिं डेब्यु याःगु खः तर नं पाकिस्तान विरुद्ध घरेलु टिम इंग्ल्याण्ड हावी जुल । कासाय् टस बुना न्हापा व्याटिङ याःगु पाकिस्तानं ३५गू ओभर २गः बलय् अलआउट जुया सच्छि व ४१गू रन जक दयेकेत ताःलात ।
लिसःलय् सच्छि व ४२गू रनया सामान्य आज्जु इंग्ल्यान्डं २१गू ओभर ५गः बलय् १गू विकेट तंका पूवंकल । इंग्ल्यान्ड त्यागुलिइ डाविड मालनं अविजित ६८गू रन व ज्याक क्रलें अविजित ५८ गू रन मुंगु खः ।
कासा त्यागु लिसें इंग्ल्यान्डं ३गू कासाया श्रृंखलाय् १–०या अग्रता दय्कुगु दु । श्रृंखलाया निगूगु कासा कन्हय् लण्डनस्थित लर्ड्स क्रिकेट मैदानय् जुइ ।
Categorized in कासा
