पार्टी दुने वादविवादं आत्ते जुइम्वाः, नेता नेपाल
लहनान्युज | गुंलाथ्व द्धितीया ११४०,साउन ७ बुधवाः
नेपाल कम्युनिष्ट पार्टी नेकपाया वरिष्ठ नेता एवं पुर्वप्रधानमन्त्री माधवकुमार नेपालं पार्टी दुने वादविवाद जूसा आत्ते जुइ माःगु कारण मदुगु धका धयादिगु दु ।
येँ महानगरपालिका वडा–१८ य् निर्माण जूगु पुष्पलाल स्मृति पार्कया थौं जूगु उलेज्या ज्याझ्वलय् सम्वाद जूया च्वंगु दु व विधिपाखे दक्को टुंगो लगे जुइ धका धयादिगु दु । नेता स्वया न पार्टी दयेकेगु आधारय् न्ह्यामाः धका जोड बियादिगु दु ।
नेता नेपालं ‘नेतापि दथुइ विश्वास व समझदारीया समन्वय जूसा अले विधिया आधारय् टेके जूया न्ह्या थे याःगु सामना याये फइ धका धयादिगु खः ।
उगु ज्याझ्वलय् पुष्पलालया योगदान याःगु कदर यासे पार्टी एकताया दयेका यकेमाः धका धयादिगु खः । नेता नेपालं सूना नं जानि–जानि कमजोरी याःसा उकिया सजाय पार्टीं मखू व्यक्तिं याये माः धका धयादिगु खः ।
उगु ज्याझ्वलय् येँ महानगरपालिकाया प्रमुख विद्यासुन्दर शाक्यं दक्को नेतापिन्त एकताबद्ध जुगु सन्देश बिया दक्को कार्यकर्ता व नेपाली जनता याःगु मन त्याकेत सुझाव बियादिगु खः ।
बागमती प्रदेशया सांसद बसन्त मानन्धरं नेकपाया विकल्प नेकपा हे खः धका धयादिसे नेता प्रधान मखू नीति प्रधान जुइ माःगु खँय् बः बियादिगु खः।
येँ मनापा १८या वडाध्यक्ष न्हुच्छेकाजी महर्जनं पार्टीया गोप्य बैठकया समाचार बैठक सिमधःगु इलय् माजिक सञ्जाल वइगु दुःखद् खँ खः धका धयादिसे नेतापि एकताबद्ध जूया वःगु सन्देश बिइत इनाप यानादिगु खः ।
