पार्टी प्यालेसय् तयाः नकल धाःसा येँ मनपां खर्च बी : मेयर शाक्य
नृपेन्द्रलाल श्रेष्ठ | कौलागा चतुर्थी ११४०,कार्तिक १९ बुधवाः
थनया खुलामञ्च लगायत थीथी सार्वजनिक थासय् थौंकन्हय् हुलमुल मुंकाः निःशुल्क जा नकेगु ज्यायात बन्द यानाः पार्टी प्यालेसय् तयाः नकेगु व्यवस्था यात धाःसा पार्टी प्यालेसया खर्च येँ मनपां व्यहोरे याइगु जूगु दु ।
खुल्लामञ्चय् खुल्ला रूपं जा नकेगु ज्या जुयाच्वंगु खँय् आपत्ति क्यँसें येँ महानगरपालिकां उकियात बन्द यानाः व्यवस्थित रुपं जा नकेत इनाप याःगु खः । तर थुकी येँ महानगरपालिकां निःशुल्क जा नके बीगु ज्याय् पंगः थन धकाः पिने प्रचार जूगुलिं थौं मनपां छगू पत्रकार सम्मेलन हे यासें थःगु धापू स्पष्ट याःगु खः ।
पत्रकार सम्मेलन लिपा हे खुलामञ्चय् जा नकेगु ज्या यानाच्वंपिं पुचःतलिसे येँ मनपाया मेयर विद्यासुन्दर शाक्यया वार्ता जूगु खः । उगु वार्ताय् आः वइगु स्वन्ति तक जक खुलामञ्चय् तयाः जा नकेगु व वयां लिपा पायक जूगु पार्टी प्यालेसय् तयाः नकेगु लिसें उकिया खर्च येँ मनपां व्यहोरे यायेगु सहमति जूगु खः ।
थ्व स्वयां न्ह्यः जूगु पत्रकार सम्मेलनय् न्ववासें मनपा मेयर विद्यासुन्दर शाक्यं थःपिंसं निःशुल्क नके दइ मखु धकाः सुयातं धयागु मदु, नकेगु खःसा थःगु हे निजी थासय् वा पार्टी प्यालेसय् तयाः नकूसां जिउ, बरु माल धाःसा उकिया खर्च मनपां पुला बीगु घोषणा यानादीगु खः ।
लिसें वय्कलं सकलें मनूतय्त निःशुल्क नकेगु याये मजिउ धासें ज्या यायेफुपिंत ज्या याकाः नकेमाः, उमित माल धाःसा मनपां वालय् निन्हु ज्या बीगु खँ नं कनादिल । यदि नये मखनाच्वंपिं, ज्या मदुपिं, अशक्त, असहाय सुं दुसा थः च्वंच्वनागु वडा कार्यालयय् स्वापू तल धाःसा उमित नकेगु व्यवस्था मनपां प्रतिवद्धता नं मेयर शाक्यं प्वंकादिल । येँ देय् ज्या यानाः नइपिनिगु शहर खः, थ्वयात फ्वनाः नइपिनि शहर दयेकेगु ज्या मयासे धासें मेयर शाक्यं रत्नपार्कय् लाइन च्वनाः नयाच्वंपिं मनूतय्गु किपा सामाजिक सञ्जालय् व्यापक यानाः उमिगु आत्मसम्मानय् घाः लाकेगु ज्या मयायेत नं इनाप यानादिल ।
पार्टी प्यालेसय् तयाः नकेबलय् उकिया खर्च थःपिंसं व्यहोरे याये धायेधुंकाः नं यदि सुनां नं रत्नपार्कया खुल्ला थासय् हे तयाः नकेगु धाल धाःसा थःपिंसं उपिंलिसे मुठभेड यायेगु मखु, सम्झे बुझे यायेगु ज्या याये धकाः नं मेयर शाक्यं कनादिल ।
पत्रकार सम्मेलनय् वडा नं. ३ या वडा अध्यक्ष दीपक केसी, वडा नं. १० या वडा अध्यक्ष रामकुमार केसी व वडा नं. १६ या वडा अध्यक्ष मुकुन्द रिजालपिंसं नये मखंपिं मनूतय्त वडापाखें बियाच्वनागु सेवा बारे जानकारी बियादीगु खः।
Categorized in राष्ट्रिय
