पिपिएल क्रिकेटया उपाधी त्याकल चितवन राइनोजं
निगूगु संस्करणया पोखरा प्रिमियर लिग क्रिकेट (पीपीएल)या उपाधि चितवन राइनोजं त्याकूगु दु । 
 
पोखरा क्रिकेट ख्यलय् थौं जूगु फाइनल कासाय् विराटनगर टाइटन्सयात ३२ रनं बुकाः चितवनं उपाधि त्याकूगु खः ।
 
२०३ रनया तःधंगु आज्जु लिनाः ख्यलय् कुहांवःगु विराटनगरं निर्धारित २० ओभरय् ७ विकेट छ्वयाः १७० रन जक दयेकेफत । 
 
विराटनगरया लागिं मोहमद जैद आलमं ५७ रनया अर्धशतकीय इनिङ्स म्हितल । आलमं ४८ बलय् ५ चौका व ३ छक्का थ्वाःसां टिमयात त्याकाबी मफुत । 
 
कप्तान प्रदिप सिंह ऐरीं ३६, पुनित मेहेरां ३२ व नोमान खानं १८ रन दयेकल ।
 
बलिङपाखे चितवनया करन केसीं ३ व सन्नी पटेलं २ विकेट काल । रोहण मुस्तफां १ विकेट काल । 
 
थ्वयां न्ह्यः, टस बुनाः न्हापां ब्याटिङ याःगु चितवनं निर्धारित २० ओभरय् ५ विकेट छ्वयाः २०२ रनया तःधंगु योगफल दयेकल ।
 
चितवनया तःधंगु स्कोरय् अनिलकुमार शाह व रोहन मुस्तफां अर्धशतकिय इनिङ्स म्हितल । निम्हेसिनं नं ५०–५० रन दयेकूगु खः ।
 
कप्तान पारस खड्कां २५, आरिफ शेखं १९, सन्नी पटेलं १६ व करण केसीं २६ रन दयेकल । 
 
विराटनगरया पुनित मेहेरा व जैद आलमं २–२ विकेट काल । किशोर महतों १ विकेट काल ।
Categorized in कासा