पिसिआर कोरोनाया वासः मखूगु मेयर शाक्यया धापू
नृपेन्द्रलाल श्रेष्ठ | गुंलागा पञ्चमी ११४० (२०७७ साउन २४) शनिबाः
येँ महानगरपालिकाया प्रमुख विद्यासुन्दर शाक्यं आःया संक्रमणया इलय् आम सर्वसाधारण थः हे सचेत मजुइगु खःसा सरकारं याये धयां नं कोरोना नियन्त्रण याये मफइगु धयादीगु दु ।
येँय् जूगु छगू ज्याझ्वलय् नवासें कामपा प्रमुख शाक्यं पिसिआर परिक्षण यायेमाल धकाः अनसन च्वनाः हुलमुल याःबलय् बरु व हे हुलं संक्रमण न्यनीगु खतरा अप्वःगु धयादिल ।
पिसिआर परिक्षण थकायेवं तुं संक्रमण नियन्त्रण जुइगु मखसें सरकारं जारी याःगु स्वास्थ्य मापदण्ड पालना यायेगुया विकल्प मदुगु वयकःया धापू खः । कोरोना संक्रमणया वासः मखूगु धयादीगु दु ।
‘पीसीआर परिक्षणय् प्रति व्यक्ति १०द्वः तका खर्च जुइ, परिक्षणयात माःगु सकतां ज्वलं विदेशं हयेमाः,’ मेयर शाक्यया धापू खः । ‘आः थन पीसीआर यानाः झी गनं वन व अन हे संक्रमितया स्वापुतिइ वल धाःसा कोरोना पुनेफु ।’
लकडाउनया इलय् स्वनिगलय् दुमकाः धकाः याःगु आलोचना लुमंकुसें मेयर शाक्यं लाःथेपाथे मनूत स्वनिगः दुकायेबलयया लिच्वः आः खनेदयाच्वंगु धयादिल ।
पिनं मनूत दुकाःबलय् थन संक्रमण अप्वयावंगु व थज्याःगु इलय् जुलुस पिकायेगु ज्या जूबलय् व हे जुलुसं संक्रमण न्यनीगु ग्याःचिकु नं अप्वःगु वयकलं धयादिल ।
उगु ज्याझ्वलय् शाक्यं येँ महानगरपालिका वडा नम्बर २५ या श्रीघःस्थित धर्मकीर्ति विहारय् वौद्ध परियति शिक्षाया विद्यार्थीयात सिरपाः लःल्हानादीगु ख ।
उगु इलय् मेयर शाक्यं येँ नगर दुने दुगु बुद्ध विहारया मुल भवन, लुम्बिनीया वज्रयान महाविहार, जनबहाःद्यःया दिगिछेँ, स्वयम्भूस्थित भजनछेँ नापं दुगु विहार, स्वयम्भूस्थित आनन्दकुटी विहार, किम्डोलस्थित आनन्दभुवन विहार, वानेश्वरस्थित अन्तर्राष्ट्रिय बौद्ध भावना केन्द्र दयेकेत ग्वाहालि यानाच्वनागु जानकारी नं बियादिल ।
येँ महानगरपालिकां उगु विहारयात वौद्ध परियति शिक्षाया लागिं ५ लख तका ग्वाहालि याःगु खः ।
Categorized in राष्ट्रिय
