२०७९ श्रावण २५, बुधबार

पीएम कप क्रिकेटय् आर्मी, पुलिस, एपीएफ व बागमतीया सुखद सुरुवात

थिंलागा नवमी ११४२, पुष २७ मंगलवाः

विभागीय टोली त्रिभुवन आर्मी, नेपाल पुलिस व एपीएफलिसें बागमती प्रदेशं म्हिगःनिसें येँय् न्ह्याःगु प्रधानमन्त्री कप राष्ट्रिय क्रिकेट धेंधें बल्लाखय् बांलाःगु सुरुआत याःगु दु ।

किपूस्थित त्रिभुवन विश्वविद्यालयय् ख्यलय् म्हिगः जूगु कासाय् आर्मीं कर्णाली प्रदेशयात ६३ रनं अले पुलिसं सुदुरपश्चिम प्रदेशयात २ रनं बुकाः विजयी सुरुवात यात । मेगु कासाय् एपीएफं प्रदेश २ यात २४ अले बगामती प्रदेशं लुम्बिनी प्रदेशयात ४९ रनं बुकाबिल ।

सच्छि व १७ रनया आज्जु ल्यूगु कर्णाली १४ दशमलब ४ ओभरय् दक्वं विकेट तंकाः ५३ रनय् लिकुन । थ्वयां न्ह्यः, टस बुनाः न्हापां ब्याटिङ याःगु आर्मीं १९ ओभर १ बलय् अलआउट जुइ न्ह्यः सच्छि व १६ रन दयेकल ।

अथे हे, मुलपानी क्रिकेट ख्यलय् पुलिसं ब्यूगु ९४ रनया आज्जु ल्यूगु सुदुरपश्चिमं २० ओभरय् ९ विकेट तंकाः ९१ रन जक दयेकूबलय् पुलिसं २ रनया रोमाञ्चक जित पिकाःगु खः ।

थ्वयां न्ह्यः न्हापां ब्याटिङ याःगु पुलिसं २० ओभरय् ८ विकेट तंकाः ९३ रन दयेकूगु खः । किपुलिइ हे जूगु मेगु कासाय् एपिएफं प्रदेश नम्बर २ यात २४ रनं बुकाबिल ।

सच्छि व ६४ रनया आज्जु ल्यूगु प्रदेश २नं २० ओभरय् ९ विकेट तंकाः सच्छि व  ३९ रन जक दयेकेफत । थ्वयां न्ह्यः एपीएफं क्वःज्यूगु २० ओभरय् ५ विकेट तंकाः सच्छि व ६३ रन दयेकूगु खः ।

मेगु कासाय् बागमतीं मूलपानी क्रिकेट ख्यलय् लुम्बिनी प्रदेशायत ४९ रनं बुकूगु खः । कासा त्याकेत सच्छि व १५ रनया आज्जु ल्यूगु लुम्बिनी १५ दशमलब ४ ओभरय् लिकुन ।

टस त्याकाः न्हापां ब्याटिङ याःगु बागमतीं क्वःज्यूगु २० ओभरय् ७ विकेट तंकाः सच्छि व १४ रन दयेकूगु खः । धेंधें बल्लाखय् थौं नं प्यंगू कासा जुइत्यंगु दु ।

Categorized in कासा