पुचः त्याकामि जुयाः नेपाल सेमिफाइनलय्
लहनान्यूज सम्वाददाता | ११३७ कछलाथ्व अष्टमि (८ नोभेम्बर २०१६)
मलेसियाय् न्ह्यानाच्वंगु एएफसी सोलिडारिटि कप फुटबलय् नेपाल पुचः त्याकामि जुयाः सेमिफाइनलय् थ्यंगु दु ।
मलेसियाया कुचिङ्गय् च्वंगु सारावाक स्टेट रंगशालाय् थौं जूगु कासाय् नेपालं ब्रुनाइयात स्वंगू गोलं बुकाः पुचः त्याकामि जुइत ताःलाःगु खः ।
नकतिनि क्वचाःगु कासाय् न्हापांगु हाफया अतिरिक्त इलय् नवयुग श्रेष्ठं गोल यासें नेपाःयात न्ह्यःने लाकूगु खः । मिडफिल्डर हेमन गुरुङ्गं थ्वाःगु बल ब्रुनाईया डिफेन्सय् लायेधुंकाः पेनाल्टी लागाय् च्वनाच्वंम्ह श्रेष्ठया थाय् थ्यंगु बलयात अःपुक हे गोलय् हिलाब्यूगु खः ।
थ्वहे झ्वलय् कासाया निगूगु हाफय् कासाया ७१गूगु मिनेटय् भरत खवासं उत्कृष्ट गोल यासें नेपाःयात अग्रता निदुगं यात । ८०गूगु मिनेटय् चूलाःगु पेनाल्टीयात विमल घर्ती मगरं सदुपयोग यासें नेपाःया नितिं स्वंगूगु गोल याःगु खः ।
न्हापांगु कासाय् कमजोर टिम टिमोर लिस्टेलिसे गोलरहित ज्वलिंज्वः म्हितूगु नेपालं थौं ब्रुनाईयात स्वंगू गोलं बुकाः ४गू ल्याः कासें समूहया शीर्ष थासय् लाःगु दु । अथे हे छगू कासा म्हिते ल्यंदनिबलय् सेमीफाइनलय् दुहांवंगु ब्रुनाई थुगु कासा बुइवं उपविजेताय् सीमित जूवंगु खः ।
Categorized in कासा
