पूच्वया करोडौं तकयाजग्गा अतिक्रमण
लहनान्युज | तछलाथ्व तृतिया ११३९ (जून ६ २०१९)
मापदण्डय् लाःगु धकाः स्कूलया अनुमति हे मकासे पःखाः पियाः पिल्लर लिसेंया पःखाःदन
देय्न्यंक हे सार्वजनिक सम्पत्तियात भूमाफिया तसें थःगु नामय् याना तःगु, कब्जायाना तःगु धकाः मदिक्क बुखँ वयाच्वंगु इलय् लिपांगु अवस्थाय् यल महानगरपालिकाया छगू ब्वनेकुथिया थ्यं मथ्यं ७ गू करोड तका बराबरया जग्गा नं अतिक्रमणय् लाना च्वंगु खँपिहां वःगु दु ।
यल महानगरपालिका वडा नं. ३य् लाःगु उगु ब्वनेकुथिया कम्पाउण्ड दुनेया जग्गा हे अतिक्रमय् लाःगु दु । सतक विस्तारया नामय् ब्वनेकुथिया ८ आना जग्गा अतिक्रमय् लाकूगु दु । यल महानगपालिका वडा नं.३ व वडा नं. २०या सिमानय् लाःगु उगु ब्वनेकुथिया पूर्वपाखेया खाली जग्गाय् सतक विस्तारया झ्वलय् निम्ह हे वडा अध्यक्षपिन्सं मापदण्ड अःखः यकःति कथं निर्णय याःगुलिं अतिक्रमणय् लाःगु स्थानीयवासी पिनिगु धापू दु ।
योजनाबद्ध कथं उपभोक्ता समिति हे दय्काः ब्वनेकुथिया जग्गायात सार्वजनिक जग्गा धकाः नियम, ऐन, सर्वोच्च अदालतया आदेशयात तकं हाचां गायाःउगु ब्वनेकुथिया जग्गायात अतिक्रमण याय्गु ज्या याःगु खनेदु । सर्वोच्च अदालतं तकं छुं नं ब्यक्तिवा संस्थाया जग्गा सतक विस्तारया नामय् काय्गु खःसा मुआब्जा व क्षतिपूर्ति बिया जक काय् माः धकाः आदेश ब्यूगु
खःसा उगु आदेशयात तकं हाचां गायाः जनप्रतिनिधित हे न्ह्याःवंगुलिं मनूतय्सं न्ह्यसःतया हःगु दु ।
महानगरपालिकां धाःसा २०४४ सालय् लागू याःगु ‘गाइडलाइन डेभलपमेण्ट’ कथं सतक विस्तार याय्गु झ्वलय् पिने पःखाः थुनेगु आज्जु तयाः विस्तारया ज्या यानागु खः धकाः धाःगु दुसा महानगरपालिकाया प्रमुख चिरिबाबु महर्जनं उगु ज्या नियम संगत जूगु दावीयाना वया च्वनादीगु दु । सतक विस्तारया झ्वलय् वडाया तप्यंक हे हस्तपक्षेपय् ब्वनेकुथियात जानकारी हे मब्यूसे कम्पाउण्ड दुनेया पक्की पिल्लर लिसेंया न्हूगु पःखाः दय्कूगु दु ।
थु कथं ब्वनेकुथिया भौतिक सम्पत्तिइ हे क्षति जुइ कथंया ज्या जूसां नं विद्यालय व्यवस्थापनयात जानकारी याकेमाःगु खः, तर थःपिन्त जानकारी हे मब्यूसे थ्व ज्या यात धकाः विद्यालय व्यवस्थापन समितिं धाःगु दु । थ्व जग्गाया मू थौंकन्हय् प्रतिआना ७० लख तका निसें छगू करोड तका तक थ्यना च्वंगु दु । वडा नं. २या वडाध्यक्ष चन्द्रलाल महर्जनं नगरपालिकाया मापदण्ड कथं पुलांगु मिश्रित बसोबास दुगु लागाय् लाःगु व अजाःगु थासय् खालि जूसा थासय् त्वःतेमाः धाःगु अलय् व हे कथं मदन स्मारक विद्यालयया जग्गा कयाः अथे ज्या यानागु जानकारी बियादिल ।
विद्यालय बचाउ अभियानय् सक्रिय जुयादीम्ह पृथविन्दु महर्जन, महेशराज बज्राचार्य नापं स्थानीय तय्सं बैशाख १९गते जिल्ला प्रशासन ज्याकुथि लिखित रुपं हे ध्यानाकर्षण पौ ब्यूगु खः । अनं लिपा प्रशासनपाखें जुयाच्वंगु ज्या दिकेत निर्देशन ब्यूगु खः ।
जग्गा अतिक्रमण जुयाः विद्यालयपाखें थःके दुगु अधिकार तकं उपयोग याय् फया च्वंगु मदु । विद्यालयया कम्पाउण्ड दुने पिल्लर सहितया पःखाः दनेगु ज्या दिके माःगु माग याय् माःगु थासय् पःखाःया बच्छिब्व दय्के धुंकाः तकं छुं नं कथंया प्रतिक्रिया मवल । विद्यालयपाखें थुगु खँय् थःपिन्त जानकारी तकं मदुगु जानकारी बियादिल ।
विद्यालयपाखें स्वीकृति काःगु अवस्थाय् व्यवस्थापन समितिपाखें स्वीकृति याक ेमाःगु खः । थुकथं ज्या न्ह्याकल धाःसा लँ बिस्तार सम्भव मदु धकाः विद्यालयलिसे अनुमति हे मकासे ज्या यानागु खः धकाः वडाध्यक्षं स्पष्ट यानादिल । मापदण्ड कथं सतक विस्तार याय्गु इलय् सतकया केन्द्रपाखें जवय् ९ गू फिट तःबाला याय् माःगु व उकिया नितिं निखेरं बराबर यानाः साढे ४ फिट जक तबाला याय्माःगु खः, तर उकियात बेवास्ता यानाः महानगरपालिकाया निम्ह हे वडाध्यक्षपिन्सं ब्वनेकुथिपाखे जक ९गू फिट तबाला याःगु दु । स्थानीय थीथी मनूतय्गु स्वार्थ कथं अथे ज्या याःगु तकं मनूतसें धाःगु दु । स्थानीयपाखें जिल्ला प्रशासन ज्याकुथिइ लिखित रुपं ध्यानाकर्षण पौ बीधुंकाः जक थःपिन्सं स्यूगु व जिल्ला प्रशासनया आदेशय् आः निर्माणया ज्या दिनाच्वंगु धाःगु दु ।
ब्वनेकुथिया नामय् मुक्कं यानाः २५पी जग्गा दु । थ्व जग्गा तकं थीथी इलय् लीजय् बिया वयाच्वंगु दु । सपिङ कम्प्लेक्सया नितिं निर्माणया अनुमति बिया ब्वनेकुथिया स्वामित्वय् दुगु सार्वजनिक जग्गा अतिक्रमणय् लाना वयाच्वंगु खः । बास्तवय् मापदण्ड दुने लाःगु जग्गा धइगु सार्वजनिक जग्गा धाय्गु अधिकार सुयाके नं मदु । मापदण्ड धइगु भौतिक संरचना निर्माणया नितिं जक खः ।
उकिं जनप्रतिनिधि तय्सं नेपाःया ऐन नियम कानूननिसें सर्वोच्च अदालतं ब्यूगु आदेशयात बेवास्ता याना वनेगु धइगु कानूनयात तकं हाचां गायावनेगु खः । थुगु खँय् सरोकारवाला तय्सं बिचाःयाय्माःगु अवस्था दु ।
