२०८१ आषाढ ५, बुधबार

पूच्वय् घटनाय् ज्वंपिन्त मत्वःतूसा संघर्ष न्ह्याकेगु अभियन्तातय् धापू

बिकाश | ञंलागा ५ ११४०,भाद्र २२ सोमवाः

वंगु विहिबाः यलया पूच्वय् बुंगद्यःया रथ सालेगु झ्वलय् जूगु झडपय् ज्वंपिनिगु रिहाईया माग यासें थीथी संघसंस्थातपाखें धमाधम विज्ञप्तीत सार्वजनिक जुयाच्वंगु दु । 
 
थ्व हे झ्वलय् गुथि विधेयकया आन्दोलनया झ्वलय् सक्रिय थीथी ३५ संघसंस्था व अभियन्तातय् नामं मंकाः विज्ञप्ती जारी जूगु दु ।
 
नेपाः युथ अर्गनाइजेसनया पहलय् जारी विज्ञप्तीइ विहिबाः पूच्वया घटनायात कयाः जुयाच्वंगु धरपकडया भत्सर्ना यासें ज्वनायंकूपिं सकसितं निशर्त रिहाइ यायेत माग याःगु दु । 
 
‘आधिकारीक निकाय गनं नं पहल मजुयाः रथ जात्रा अलपत्र त्वःताब्यूबलय् धर्म, संस्कृतिप्रतिया ज्वनाः वःगु जनसमुदाययात लःया फोहरां कयेकेगु, टियर ग्याँस कयेकेगु ज्या आपत्तीजनक खः’ विज्ञप्तीइ धयातःगु दु । 
 
लिसें पुल्चोकं जक मखसें छेँय् छेँय् हे वनाः अभियन्तातय्त धरपकडक यायेगु व ज्वनायंकूपिं अभियन्तातयत नापलाःवंपिन्त तकं याःगु धरपकडं राज्यया तानाशाही प्रवृित्त खनेदुगु दावी तकं विज्ञप्तीइ यानातःगु दु ।
 
आदिवासी नेवाःतय् गुथियात स्वायत्तता मब्यूगु हुनिं पूच्वया घटना जूवंगु धासें नेवाःतय् गुथियात स्वायत्तता व स्वसासन बीत नं विज्ञप्तीमार्फत माग याःगु दु ।
 
‘धार्मिक, सांस्कृतिक, ऐतिहासिक, पुरातात्विक महत्व कुबियाच्वंगु बुंगद्यःया जात्राया झ्वलय् जूगु घटनाय् राज्यया ब्यवस्थापकिय क्षमता मदुगु स्पष्ट खनेदु’ विज्ञप्तीइ दावी याःगु दु ।
 
रथ दयेकेधुंकूगु व बुङ्गद्यः रथारोहण् जुइधुंकूगु अवस्थाय् सुरक्षित व व्यवस्थित ढङ्गं जात्रा क्वचायेकेत तारन्ताः ताकेता याःगु अवस्थाय् नं गुठी संस्थान यल, जिल्ला प्रशासन ज्याकू यल, यल महागरनपालिका लिसें सरोकारवाला सरकारी निकाय गैरजिम्मेवार जूगु नं ठहर याःगु दु । 
 
विज्ञप्ती जारी याये न्ह्यः गुथि विधेयकया आन्दोलनय् सक्रिय थीथी अभियन्ता व संघसंस्थाया प्रतिनिधितय् मुना येँय् जूगु खः ।
 
मुनाया ब्वतिमिपिन्सं पूच्व घटनाय् ज्वंपिं अभियन्तातयगु निशर्त रिहाईया लागिं माल धाःसा सडकय् कुहांवयेगु तकंया विषयस सहलह याःगु खः ।
 
मुनाय् सामाजिक अभियन्ता पवित्र बज्राचार्य, राष्ट्रिय पहिचान संरक्षण संयुक्त संघर्ष समितिया प्रतिनिधिपिं, जनसरोकार समन्वय समितिया कजि श्यामकृष्ण प्रजापति, सेभ नेपाः भ्यालीया सुरज महर्जन लिसें थीथी संचारगृहस कार्यरत संचारकर्मीतय् तकं उपस्थिती दुगु खः ।
Categorized in राष्ट्रिय