पूच्वय् ज्वंपिन्त त्वःतेत हलिं नेवाः दबूपाखें नं माग
शोभा श्रेष्ठ | ञंलागा ४ ११४० (भाद्र २१) आइतवाः
वंगु भाद्र १८ गते यल महानगरपालिकाया पूच्वय् ज्वनायंकूपिन्त तुरन्त रिहाई यायेत हलिं नेवाः दबूपाखें नं माग याःगु दु ।
दबूपाखें प्रेस विज्ञप्ती जारी यासें विहिबाः यलय् प्रहरीपाखें जूगु दमन व विरोधया भत्सर्ना यासें ज्वनायंकूपिन्त तुरन्त त्वःतेत सम्वन्धित निकाययात माग याःगु खः ।
‘राजाकाल व पंचायतकालय् तकं मजूकथं जूगु थुगु सरकारया नृशंस दमनप्रति घोर भत्सर्ना व विरोध यासें हिरासतय् तैतःपिं पत्रकार, अभियन्ता, व स्थानीय व्यक्ति सकलसित तुरन्त रिहाई यायेत सम्वन्धित निकाययात दुनुगलं इनाप यानाच्वना’ विज्ञप्तीइ धयातःगु दु ।
आइएलओ १६९ पाखें नं स्थानीय संस्कृति/परम्परा हनेगु खँय् स्थानीयवासीपिन्सं थःगु स्वविवेक छ्यलेदइगु धासें थथे मजूगु अवस्थाय् हे आन्दोलित जूपिं स्थानीयवासीं रथ साःवंगु दबूपाखें जारी विज्ञप्तीइ न्ह्यथनातःगु दु ।
बुंगद्यःयात रथय् विराजमान जुइधुंकूगु अवस्थाय् नं कोभिड महामारीया हुनिं १६सः दँ पुलांगु ऐतिहासिक जात्रा सम्वन्धित निकाय व सरोकारवालापिन्सं निर्णय यायेमफुबलय् थुगुसी जुइला मजुइला धइगु अन्यौलया अवस्था जूगु नं विज्ञप्तीइ धयातःगु दु ।
Categorized in राष्ट्रिय
