पूर्वमन्त्री खत्रीलिसे न्यागू लखतकया धरौटी माग
फर्जी बैंक ग्यारेन्टी याःगु इलय् जमानी च्वंगु द्वपं लाःम्ह कर्णाली प्रदेशया पूर्वमन्त्री खड्गबहादुर खत्रीलिसे उच्च अदालत पाटनं न्यागू लखतका धरौटी माग याःगु दु ।
 
थौं बुधवाः अदालतय् उपस्थित जुयादीम्ह खत्रीया थुनछेक बयान व बहस लिपा मुख्य न्यायाधीस नहकुल सुवेदी व न्यायाधीस टेकनारायण कुँवरया इजलासं खत्रीलिसे न्यागू लखतका धरौटी फ्वंगु खः । 
 
कृषि विकास बैंक रत्नपार्कया जाहेरीइ नेपाल सरकारं हे खत्रीविरुद्ध बैंकिङ कसूर सम्बन्धि मुद्दा तःगु खः । मन्त्री थःहे ठेकेदार खः । मन्त्री खत्रीया केएसके नांया कन्स्ट्रक्सन कम्पनी सुर्खेतय् दु ।
 
५५/५५गू लखतकाया निगू ठेक्काया बैंक ग्यारेन्टी फर्जी दयेकूगु इलय् वय्कः साक्षी च्वंगु खः । प्रहरीं वय्कःया बयान नं संलग्न याःगु दु ।
 
बैंक ग्यारेण्टीइ ठेकेदार रणवीर तुम्बा व देवजंग शाहीया प्रत्यक्ष संलग्नता दुगु खः । उगु मुद्दाय् तुम्बा, शाही व बैंकया तत्कालीन शाखा अधिकृत छविलाल ढकालयात प्रहरीं ज्वनाः अदालतय् न्ह्यब्वःगु खः । 
 
प्रहरीं प्रतिवादी कायम यानाः मन्त्री खत्री व मेम्ह राजुप्रसाद श्रेष्ठ उपस्थित मजुइवं अदालतं स्वन्हुया दुने ज्वनेत धाःगु खः ।
Categorized in अपराध