पेट्रोलय् १तका कुहांवल ।
लहनान्युज | ने.सं.११३९ तछलाथ्व दुतिया (५ जुन, २०१९)
नेपाल आयल निगमं छगू लिटर पेट्रोलय् १तका क्वकाःगु दु । अन्तर्राष्ट्रिय बजाःया भाः कुहांवःगु न्ह्यथसें निगमं थौं बुधवाः चान्हय् निसें लागू जुइकथं भाः क्वकाःगु खः ।
‘भारतीय आयल निगम (आइओसी)पाखें छ्वयाहःगु न्हूगु भाःया धलःकथं पेट्रोलय् १तका कुहांवःगु खः ।’ निगमया उपनिर्देशक विनितमणि उपाध्यायं धयादिल, ‘न्हूगु भाः बुधवाः चान्हय् १२ताः इलंनिसें लागू जुइ ।’
न्हूगु भाः समायोजन लिपा पेट्रोल १गू लिटरया ११०तका कायम याःगु निगमं न्ह्यथंगु दु । निगमं डिजेल, मचिकं, हवाई इन्धन, एलपी ग्यासया भाः धाःसा यथावत हे कायम याःगु दु ।
नेपाल आयल निगम नोक्सानय् वनेधुंकाः २०७१ असोजय् स्वचालित प्रणाली लागू याःगु खः । उकथं निगमं समायोजन याना वयाच्वनागु दावी याःगु दु । निवाः न्ह्यः बजेट भाषणया झ्वलय् अर्थमन्त्री युवराज खतिवडां लँ दयेकेगु नामय् १गू लिटर पेट्रोल व डिजेलय् १तका १तका थप शुल्क कायेगु निर्णय याःगु खः ।
तर बजेट भाषण लिपा हे निगमं चांचां भाः समायोजन यानाः पेट्रोल व डिजेलया छगू छगू लिटरय् १.५० तका दां थकागु खः ।
Categorized in राष्ट्रिय
