पेट्रोलियम ज्वलंनय् भाः थकाःगुया विरोधय् नेत्रविक्रम चन्द नेतृत्वया नेकपां याःगु नेपाल बन्दया लिच्वः छुं भचा खनेदूगु दु ।

स्वनिगःलय् सार्वजनिक यातायात व शैक्षिक क्षेत्रय् लिच्वः लाःसा नं बजाः व निजी सवारीइ धाःसा लिच्वः लाःगु खनेमदु । स्वनिगःलय् सार्वजनिक सवारी ज्वलंत म्हो जक ल्याःखय् न्ह्याबलय् सुथय्सिया इलय् छेँ नं पिहाँवनिपिन्सं धाःसा सास्ती फयेमाःगु दु ।

अथेहे रात्री वसय् येँ वःपिन्सं सार्वजनिक सवारी मदूबलय् सास्ती फयेमाःगु दु । नयाँबसपार्क, कलंकी, कोटेश्वर, बल्खु, लिसेंया थासय् यात्रुं सार्वजनिक यातायातया नितिं पिइमालाच्वंगु खनेदु । स्वनिगःलं म्हो जक ल्याःखय् ताहाकःगु दूरीया गाडीत पिहाँवंगु दु ।

स्वनिगःलय् निजी सवारी ज्वलं धाःसा सामान्य अवस्थाय् न्ह्यागु दु । ब्वनेकु लिसें कलेजत धाःसा थों ठप्प जूगु दु । स्वनिगःया चुकय्चुकय् सुरक्षाकर्मीतये तःधंगु ल्याःखय् तैनाथी खनेदु । बन्दया झ्वलय् छुं नं अप्रिय घटना मजूग्ु व बन्दकर्तां जबर्जस्ती मयाःगु प्रहरीं न्ह्यथंगु दु । सुथय् हे येँया साँखुं २म्ह व महारागञ्जं ३ म्ह याना ५म्हसित नियन्त्रणय् कायेज्या जूगु नं प्रहरीं न्ह्यथंगु दु ।

उखे नेपाल बन्दया लिच्वः बुटवलय् सुथय् निसें लाःगु दु । बुटवल क्षेत्रया फुक्क धैथें सडकत सुनसान खनेदुसा निजी सवारी ज्वलंत नं छुं भचा ल्याःखय् जक न्ह्यागु दु । सार्वजनिक यातायात धाःसा ठप्प दु । बसपार्कय् बस नं म्हो जक ल्याःखय् दु ।

चुकय् चुकय् सुरक्षाकर्मी परिचालन याःगु दु । अयेसां बन्दकर्तात धाःसा सडकय् खनेमदु । ईलाका प्रहरी ज्याकु बुटवलया प्रहरी नायव उपरिक्षक ठग बहादुर केसीं छुं नं अप्रिया घटना जुइके मबिइत स्यल्लागु व्यवस्थापन जूगु धयादीगु दु ।

Categorized in राष्ट्रिय