२०८० चैत्र १५, बिहिबार

पोखरायात ९गू विकेटं बुका चितवन ईपीएल क्रिकेटया फाइनलय्

कौलाथ्व ११४१, असोज २१ बिहीवाः

चितवन टाइगर्स एभरेष्ट प्रिमियर लिग (ईपीएल) ट्वेन्टी–ट्वेन्टी क्रिकेटय् फाइनलय् थ्यंगु दु ।
 
किपुलिइच्वंगु टियु क्रिकेट मैदानय् म्हिगः जूगु न्हापांगु क्वालिफायरय् पोखरा राइनोजयात ९ गू विकेटं बुका चितवन फाइनलय् थ्यंगु खः । पोखरां  बिउगु ६७गू रनया चिधंगु हाथ्याः चितवनं ७गू ओभर ५गः बलय् छगू विकेट तंका पूवंकल  ।
 
चितवनयात त्याकाबिइत मोहमद साहजदं दक्वःलय् आपा ४८गू रन दयेकल । थ्वयान्ह्यः टस बुना न्हापा ब्याटिङ याःगु पोखरां १५गू ओभरय् अलआउट जुया ६६गू रन जक दयेकुगु खः । रिचार्ड लेभीं दक्वःलय् आपा १९ गू रन दयेकुगु इनिङ्सय् सागर ढकाल व शाहब आलमं  ४गू÷४गू विकेट काःगु खः । सोमपाल कामी व करिम जनतं  १गू÷१गू विकेट काःगु खः ।
 
चितवनं फाइनलय् निगूगु क्वालिफायरया त्याकामिलिसे शनिबाः उपाधिया नितिं म्हितिइ । पोखरां धाःसा फाइनलय् थ्यनेगु नितिं निगूगु क्वालिफायरय् बिहीबाः भैरहवा ग्लाडियटर्सलिसे म्हितिइ । इलिमिनेटर कासाय् काठमाडौं किङ्स इलाभेनयात १७ गू रनं बुका भैरहवा क्वालिफायरय् थ्यंगु खः  ।
 
कासा त्याकेगु नितिं सच्छि व ८९गू रनया हाथ्याः लिउगु काठमाडौंं नं ८ गू विकेट तंका सच्छि व ७२गू रन जक दयेकेत ताःलाःगु खः । अशन प्रियरञ्जनं ४८गः बलय् ६८गू रन दयेकुगु इनिङ्सय् जनक प्रकाशं  १४गः बलय् २८गू रन दयेकुगु खः ।
 
धमिका प्रकाश, आरिफ शेख व कुशल मल्लं २गू÷२गू विकेट काःगु खः । थ्वयान्ह्यः न्हापा ब्याटिङ्ग याःगु भैरहवां कप्तान शरद भेषावकरया २०गः बलय् दयेकुगु ४९गू, प्रदीप ऐरीया ३९गू, उपुल थरङ्गाया ३५गू व कुशल मल्लया ३२ गू रनया ग्वहालिं ८ गू विकेटया क्षतिइ सच्छि व ८८गू रन दयेकुगु खः ।
 
सन्दीप लामिछाने व अलराउन्डर अशन प्रियरञ्जनं २गू÷२गू विकेट काःगु खः । 
Categorized in कासा