बालुवाटार जग्गा प्रकरणय् दुथ्याःम्ह महासचिव विष्णु पौडेलयात भ्रष्टाचारी धासें बुटवलय् पर्चा ह्वःगु दु ।

 

नेपाली कांग्रेस बुटवल नगरसमितिया सभापतिलिसें बुटवल उपमहानगरपालिकाया प्रमुखया उम्मेदवार खेलराज पाण्डेया नेतृत्वय् बुटवल मण्डपय् थ्यंमथ्यं ३सःपाः पर्चा ह्वःगु खः । पौडेलयात कारबाही याय्माः धकाः पर्चा ह्वःगु नगर सभापति पाण्डें धयादीगु दु ।

 

नेकपा महासचिव पौडेल बुटवल प्रदर्शनी केन्द्रया शिलान्यास यायेत बुटवल थ्यंकादीगु खः । वय्कलं छुं ई न्ह्यः जक प्रदर्शनी केन्द्रया शिलान्यास नं यानादीगु खः ।

 

चुनाव न्ह्यः हे प्रदर्शनी केन्द्र दयेकेगु नितिं नक्सा तकं तयार जूगु व बुटवल नगर सर्वदलीय मुँज्यापाखें पारित जुइधुंकूगु धयादिसें नगर सभापति पाण्डें आः प्रचारया नितिं शिलान्यास याःगु नं धयादिल । पाण्डें नेपाली कांग्रेस प्रदर्शनी केन्द्र दय्केगु पक्ष हे दुगु नं स्पष्ट यानादीगु दु ।