प्यंगु प्रयोगशालायात २४ घण्टाया दुने स्पष्टिकरण बिइत माग

स्वास्थ्य तथा जनसंख्या मन्त्रालयं पीसीआर परीक्षण याइगु प्यंगु प्रयोगशालायार्त  २४ घण्टाया दुने स्पष्टिकरण बिइत माग याःगु दु।

परीक्षण नमुना क्वछिःगु इलय् भण्डारण मयाःगु धाःसे स्पष्टिकरण न्यनिइगु धका धाःगु दु। उगु प्यःगु स्टार अस्पताल, सेन्ट्रल डाइग्नोस्टिक ल्याबोरटरी, सूर्या हेल्थ केयर व ह्याम्स अस्पतालयात २४ घण्टाया दुने मन्त्रालयं स्पष्टिकरण बिइत माग याःगु दु।

मन्त्रालयं वःगु भदौ ३१ गते कोभिड–१९ या पीसीआर परीक्षण यायेगु इलय् दक्को प्रयोगशालाय् नेगेटिभ रिपोर्ट वःगु हकय् लच्छि लिपा व पोजिटिभ रिपोर्टया हकय् स्वला तक नमुना स्टोर यासे तयेगु निर्णय याःगु खः।

थुगु नियम पालना मयागुलि उगु प्रयोगशालायात स्पष्टिकरण माग यायेगु धका मन्त्रालयया प्रवक्ता डा. जागेश्वर गौतमं जानकारी बिःगु खः।

अथेहे स्वीकृत प्राप्त प्रयोगशालाया कोभिड(१९ या पीसीआर परीक्षण यासे नेगेटिभ रिपोर्ट वःपि हङकङ, दुबई व जापान वःपि मनू तयेगु सम्बन्धित देशय् अन पुनःपरीक्षण याःगु इलय् पोजिटिभ वःगु धका धाःसे संस्कृति, पर्यटन तथा नागरिक उडड्यन मन्त्रालयं स्वास्थ्य मन्त्रालययात पत्राचार यायेवं छानबिन यायेगु धका मन्त्रालयं धाःगु खः।

स्वास्थ्य मन्त्रालयं राष्ट्रिय जनस्वास्थ्य प्रयोगशालाया निर्देशकया संयोजकत्वय् छानबिन टोलीं स्थलगत अनुगमन याइगु प्रवक्ता डा. गौतमं धाःगु दु।