प्यम्ह न्यायाधीशयात छानवीन यायेत समिति नीस्वन
लहना न्यूज | ने.सं. ११३९ दिल्लागा द्वादशि (२९ जुलाइ, २०१९), सोमवाः
न्याय परिषदं उच्च व जिल्ला अदालतय् ज्या यानाच्वंपिं ४म्ह न्यायाधीशयात विस्तृत छानवीन यायेत समिति नीस्वंगु दु ।
प्रधानन्यायाधीश चोलेन्द्र शमशेर राणाया अध्यक्षताय् थौं सोमवाः च्वंगु परिषदया मुँज्यां उच्च अदालत पोखराया न्यायाधीश जीवनहरि अधिकारी, रामचन्द्र यादव व नरबहादुर शाहीयात छानवीन यायेत सर्वोच्चया न्यायाधीश सपना प्रधान मल्लया नेतृत्वय् समिति नीस्वंगु खः ।
क्षेत्राधिकार हे मदुगु छगू निजी कम्पनीया अन्तः शुल्क विवादय् स्वम्हेसितं काजय् परिषद झिके यायेगु क्वःछ्यूगु नं प्रवक्ता मानबहादुर कार्कीं जानकारी बियादीगु दु ।
अथे हे, जिल्ला अदालत येँया न्यायाधीश अर्जुन कोइरालायात छानवीन यायेत परिषदं सर्वोच्च अदालतया न्यायाधीश तेजबहादुर केसीया नेतृत्वय् समिति नीस्वंगु दु । कोइरालां यल जिल्ला अदालतय् दुगु इलय् छगू मुद्दायात कयाः याःगु निर्णय विवादय् लाःगु खः ।
परिषदया थौं सोमवाःया मुँज्यां उच्च अदालतया ३म्ह मुख्य न्यायाधीशयात सरुवा यायेगु नं क्वःछ्यूगु दु । पाटन उच्च अदालतया कुमार चुडालयात सुर्खेत, सुर्खेतया रमेश पोखरेलयात तुलसीपुर व तुलसीपुरया नहकुल सुवेदीयात पाटन सरुवा यायेगु क्वःछ्यूगु दु ।
थ्व हे दथुइ परिषदं सैनिक विशेष अदालतया अध्यक्षय् उच्च अदालत पाटनया न्यायाधीश तेजबहादुर कार्कीयात सिफारिस याःगु दु । न्याय परिषदया सिफारिसय् सरकारं उच्च अदालतया न्यायाधीशयात सैनिक विशेष अदालतया अध्यक्षय् नियुक्त यायेगु व्यवस्था दु ।
सेनाया मुद्दा स्वयेत अलग्ग हे अदालत नीस्वनेगु कानूनी व्यवस्था दु । कोर्ट मार्सलया मुद्दा उगु अदालतपाखें क्वःछीधुंकाः चित्त बुझे मजूसा जक सर्बोच्च अदालततक वये दइगु खः ।
Categorized in राष्ट्रिय
