प्यसः दँया न्ह्ययाःगु म्ये पिथन
लहनान्युज | चौलागा अष्टमी ११३८ (अप्रिल ८ २०१८)
कवि नाप जुजु सिद्धिनर सिँह मल्लं सृजना याना तःगु स्वीनिपु म्ये पिथःथु दु । ललितपुर संस्कृति सम्वद्र्धन केन्द्रया प्यक्वःगु दँमुज्याय् संस्कृतिविद् वाङमय शताब्दिपुरुष सत्यमोहन जोशीं उगु सृजना संग्रहित सिडी ‘३६ सङ्स अफपोएट किङ सिद्धिनर सिँह मल्ल’ सार्वजनिक यानादीगु दु ।
उगु ऐतिहासिक सांस्कृतिक महत्वं जाःगु म्येया सिडी विमोचन यानादीसे वाङमय शताब्दिपुरुष जोशीं सांगीतिक सांस्कृतिक परम्परा अमूर्त सम्पदां जाःगु अन्तराष्ट्रिय भाषा तक दगु थुुगु संगीतया सांस्कृतिक परम्परा संरक्षणय् थुगु म्ये लिपिवद्ध हुनु जुगु व न्येनेत सिडीया रुपय् सार्वजनिज जुगु छगुु महत्वपूर्ण घटना जुगु खँ न्ह्यथनादील ।
थुगु ज्याझ्वलय् यल महानगरपालिकाका मेयर चिरिबाबु महर्जन विशेष पाहाँ कथं झायादीगु खः ।
नेपाल सम्वत ७२० दुगु इलय् थुगु म्ये यलय् थी थी दाफा भजन, नसंचा गुथि, ताम्रकार समाजं निरन्तर रुपय् न्हिया न्हि थं भजन छ्यला च्वंगु, बुगँ द्यया जात्राय्, ज्येष्ठ पूर्णिमाय् विशेष नखः इलय् थुगु म्ये हाला वयाच्वंगु खः ।
थी थी राग व लँय् दुथ्याःगु थुगु म्ये आर्टोम्यूज रेकर्डिङ स्टुडियोया संगीत निर्देशक जुगल डंगोलयो संयोजनय् तयार जुगु थुगु म्ये अन्तरराष्ट्रिय समुदायं तक थुइके फइगु कथं पाश्चात्य व पूर्वीय निगुलि सः व लिपि तक लिपिवद्ध यान तःगु खः । नीदँ तक खोज अनुसन्धान यासें सफू तयार यानागु संगीत निर्देशक जुगल डंगोलं जानकारी बियादीगु खः ।
लोपोन्मुख थःज्यागु अमूर्त संस्कृति संरक्षणया लागि म्ये सिडी व लिपिवद्ध यायेत ग्वाहालि यानादीपि संस्कृतिविद् छत्रबहादुर कायस्थ, संगीत निर्देशक जुगल डंगोल, गुरु रामकृष्ण ताम्रकार, गुरु केशवकृष्ण श्रेष्ठ, गायक नाप सगीतकार रुद्र ताम्रकार, श्यामगोविन्द ताम्रकार, काजीवावु महर्जन, बाबुकाजी महर्जन, सनलाल ताम्रकार, ज्ञानलाल अवाले, वावुकाजी महर्जन, तह्रिबाबु महर्जन, मलिक ताम्रकारयात सम्मान न याःगु खः ।
संग्रहित म्ये मध्यय् विभास राग व धरन्जती तालयु आधारित ‘शंकर पञ्चमाः’, ‘असिक रसिक’ व ‘रागआशावरी व च्वतालया आधारित ‘छु यात मन्मथ्व’ म्ये न न्ह्यब्बयादीगु खः ।
Categorized in मनोरन्जन
