२०८० चैत्र १६, शुक्रबार

प्यानयात झंझटकथं व्याख्या यात : अर्थमन्त्री डा. खतिवडा

लहना न्यूज | ने.सं. ११३९ ञलाथ्व पारु (३१ अगष्ट, २०१९), सञ्चरवाः

अर्थमन्त्री डा. युवराज खतिवडां स्थायी लेखा नम्बर (प्यान)यात कयाः भ्रम दुगु धयादीगु दु । आपालं व्यवसायीतसें प्यानयात छगू झंझटकथं ब्याख्यालिसें प्रचार याःगु धयादिसें थुकियात कयाः असन्तुष्टि प्वंकादिल ।
 
राज्यदुने च्वनाः आय आर्जन याइपिं नागरिकया नितिं नागरिकताथें छगू अनिवार्य म्हसीका पौ जूसां नं थुकियात करकथं ब्याख्या याःगु डा. खतिवडाया धापू दु ।
 
‘प्यान छगू म्हसीका पौ खः । गुगु कायेवं हे कर पुलेगु मखु । कमे यायेधुंकाः कर पुलेमाः ।’ अर्थमन्त्री डा. खतिवडां धयादिल ।
 
नेपाल चेम्बर अफ कमर्शं ग्वसाः ग्वःगु अन्तरक्रिया ज्याझ्वलय् न्ववानादिसें डा. खतिवडां त्रास न्यंकेत स्वःसां नं प्यान बुलुहुँ अभ्यस्त जुयावनीगु धयादिल । वंगु दच्छिया दुने मुक्कं ५गू लखस्वयां अप्वःसिनं प्यान काःगु धयादिसें डा. खतिवडां थ्व बुलुहुँ अप्वया वनीगु विश्वास प्वंकादिल ।
 
न्ह्यानाच्वंगु आर्थिक वर्षनिसें छुं नं फर्मं द्वःछिस्वयां अप्वः ज्याला ब्यूसा प्यान नम्बर तयाः जक भुक्तनी याय्माःगु व्यवस्था याःगु दु । यदि अथे मयाःसा उगु खर्च क्यनेमदइगु व्यवस्था यायेवं व्यवसायीतसें उकियात कयाः विरोध याःगु खः ।
 
नेपालय् दुपिं भारतीय ज्यामिलिसें फुक्क साक्षरता मजूगुलिं तत्कल थ्व नीति सम्भव मजूगु व्यवसायीतय्गु धापू खः । तर डा. खतिवडां नागरिकता कायेत गथे पूर्वाधार व साक्षरता माः, उलि जक प्यानया नितिं माःगु स्पष्ट यानादिल ।
Categorized in राष्ट्रिय