प्रकाश दीपया स्वंगु म्येचाः पितब्बज्या
नृपेन्द्रलाल श्रेष्ठ | सिल्लाथ्व पंचमी ११३९ (मार्च ११ २०१९)
म्येच्वमि प्रकाश दीप श्रेष्ठया याकः च्वसाय् छगु ज्याझ्वः दथुइ स्वंगु म्येचाः पितब्बज्या जुगु दु ।
स्वंगुलिं म्येचाः जनकवि दुर्गालाल श्रेष्ठ, वरिष्ठ संगीतकःमि प्रेमध्वज प्रधान व म्येच्वमि आनन्दरत्न बज्राचार्यं मंकाःकथं पितब्वज्या यानादीगु खः । ज्याझ्वलय् संगीतकार जूगल डंगोल व म्येच्वमि आनन्दरत्न बज्राचार्यलिसें संगीतकार जेम्स प्रधान पाहाँ कथं झायादीगु खः ।
“चौबन्दी चोलो”, “गोरी गोरी अलि काली काली” व “परदेशी दाजै” म्येमुना पितब्वज्या जूगु दु । “चौबन्दी चोलो” म्ये मुनाय् मुक्ति एण्ड रिभाइभलया चौबन्दी चोलो म्येया नापनापं अनिल शाक्य, विरेन शाक्य, शम्भु राई, गोपाल श्रेष्ठ, नबिन कार्की, सत्यनारायण प्रजापति, मदनसिंह नेपालीया संगीतय् मुक्ति शाक्य, शम्भु राई, गोपाल श्रेष्ठ, रवि खनाल, नविन पञ्चकोटी, थुप्टेन भुटिया, नरेन्द्र प्यासी, स्वयम्भूराज शाक्य व धनुषा सिंहं सः बियादीगु दु ।
अथे हे “गोरी गोरी अलि काली काली” म्येमुनाय् जेम्स प्रधानया याकः लसय् जेम्स प्रधानया नेपालभाषाया लोकंह्वाःगु म्ये ‘धेधेचुल पासा’या नापनापं आश्विन दाहाल, एञ्जेला सिंह, सिर्जना श्रेष्ठ, रोशन तण्डुकार, सुदीप श्रेष्ठ, रवि खनाल व नरेश श्रेष्ठया सः दुथ्यानाच्वंगु दु ।
“परदेशी दाजै” म्येमुनाय् धाःसा सचिन सिंह, बीएम सिंह, कराजन, जेम्स प्रधान, भूपेन्द्र रायमाझी, मदन परियार, सुशील विश्वकर्माया लसय् सिर्जना श्रेष्ठ, रजनी प्रधानाङ्ग, सविता मालाकार, एञ्जेला सिंह, जुनु श्रेष्ठ, सपना श्री व भीमा सिंहं सः बियादीगु दु ।
रवि खनाल, एञ्जेला सिंह, गोविन्द ह्यूमतं म्येचाकय् दुथ्यानाच्वंगु म्ये हालादीगु उगु ज्याझ्वलय् म्येमुनाय् दुथ्यानाच्वंपिं म्येहालामि, लसय् हनादीपिंलिसें ग्वाहालिमिपिन्त हनेगुनापं मतिनाया चिं लःल्हाःगु खः ।
सुरजवीर बज्राचार्यं न्ह्याकादीगु उगु ज्याझ्वलय् म्येच्वमि प्रकाश दीप श्रेष्ठ व अनु श्रेष्ठ इहिपाः जूगु स्वीदँ क्यंगु लसताय् उगु ज्याझ्वः जूगु खः ।
