प्रचण्डया लिखित लिसः– “अदालतया मखुसे कार्यकारीणीया बदनियतबारे जनतातय्त सुसुचित यानागु खः”
लहनान्युज | सिल्लागा पारु ११४१, फागुन १६ आइतवाः
नेकपा दाहाल–नेपाल पुचःया नायः पुष्पकमल दाहालं अदालतया अवहेलना मुद्दाय् थौं थःहे उपस्थित जुया लिखित जवाफ पेश यानादीगु दु ।
लिसःलय् वय्कलं थम्ह अदालतया अवहेलना मयानागु जिकिर यानादिल ।
नायः दाहालं सार्वजनिक सभाय् मुद्दाया विषयस न्ववानागु मखुसे कार्यकारिणीया बदनियत व संविधान विरुद्धया ज्याया बारे जनतातय्त सुसुचित यायेगु थःगु विचाः तयागु व थुकियात अदालतयात धम्की बिउगु धासें दावी भूmठो जूगु न्ह्यथनादिल ।
उगु भाषणय् अदालतप्रति सम्मान, कार्यपालिकाया ज्याया विरोध व देय् व जनताविरुद्ध ज्याः जूगुलिं च्यूता प्वंकागु वय्कलं दावी यानादिल ।
थुकिं सम्मानित अदालतया अपहेलना जुइहे मफइगु, अदालत व न्यायाधीशउपर लान्छाना बिइगु, धम्की बिइगु, न्याय बिइगु ज्याय् पंगः थनेगु, न्यायिक फैसला हाचां गायेगु ज्या गुबलें नं मजूगु भलसाः प्वंकादीगु दाहालया लिसःलय् न्ह्यथनातःगु खः ।
छुं दिं न्ह्य येँया शान्तिवाटिकाय् ग्वसाग्वःगु सभाय् प्रचण्डं ‘केपी ओलीया निरंकुश व स्वेच्छाचारी पलाःयात पाय्छी धाल धाःसा लखौं जनता त सतकय् हयेगु’ धैगु अभिव्यक्ति बियादिगु खः ।
उगु अभिव्यक्तिं अदालतया अवहेलना जूगु धासें अधिवक्ता समिर हायुनं सर्वोच्चय् मुद्दा दर्ता यानादिगु खः ।
प्रचण्डया अभिव्यक्तिं न्यायपालिकाया स्वतन्त्रता, सक्षमता व निष्पक्षताय् गम्भीर असर जुइगु रिट निवेदनय् धयातःगु खः ।
