प्रतिधिसिभा मुँज्या थौं च्वनिगु, देउवां थौं हे विश्वासया मत नं काइगु
दिल्लाथ्व नवमी ११४१,साउन ३ आईतवाः
निक्वःखुसिइ हाकनं स्थापित प्रतिनिधिसभाया मुँज्या थौं च्वनेत्यंगु दु । न्हू बानेश्वर स्थित संसद भवनय् न्हिने ४ ता इलय् मुँज्या च्वनिइ । मुँज्याया फुक्क तयारी पूवंगु संसद सचिवालयं न्ह्यथंगु दु ।
थौं हे प्रधानमन्त्री शेरबहादुर देउवां विश्वासया मत नं काइगु धाःगु दु । संघीय संसद् सचिवालयया कथं कानूनमन्त्री ज्ञानेन्द्र बहादुर कार्कीं विश्वास मत काइगु प्रस्ताव सचिवालय् दर्ता यानादिगु खः । कार्यव्यस्था परामर्श समितिया मुँज्यां प्रधानमन्त्री देउवां काइगु विश्वासया मतया कार्यसूची थप याइगु धाःगु दु ।
अथेहे थौंया नितिं संसद अधिवेशन आह्वानया खँय् राष्ट्रपति ज्याकुया पौ, सरकार गठन व मन्त्रिपरिषद् विस्तारया खँय् पौ व छुं शोक प्रस्ताव पारित यायेगु ज्याधलः क्वजिउगु दु । कार्यव्यवस्था परामर्श समितिया मुँज्यां मेगु ज्याधलः क्वजिइगु सचिवालयं न्ह्यथंगु दु ।
संसदय् नेकपा एमाले मू प्रतिपक्षया रुपय् च्वनिइ । सर्वोच्चया आदेशपाखें संसद पुनःस्थापना लिसें ३दँ त्या सत्ताय् च्वनादीम्ह केपी शर्मा ओली नं सत्ताच्युत जुयादील । नेपाली कांग्रेसया सभापति शेरबहादुर देउवा प्रधानमन्त्री जूगु नापं एमाले मू प्रतिपक्षी दल जूगु दु । प्रधानमन्त्री शेरबहादुर देउवां संसदया चालु अधिवेशनय् हे ३०न्हू दुने विश्वासया मत कायेमाःगु संवैधानिक व्यवस्था दु । तर मिति धाःसा क्वजिइधुंकुगु मदुनि ।
अथेहे थ्वयान्ह्यःया सरकारं हःगु १६ गू विधेयकयात प्रक्रियाय् यंकेगु तयारी नं जूगु दु । तत्कालिन प्रधानमन्त्री केपी शर्मा ओलीं पार्टी दुनेया मतभेदया हुनिं वंगु पुष ५ गते न्हापांखुसिइ विघटन याःगु प्रतिनिधिसभा सर्वोच्च अदालतं फागुन ११ गते पुनःस्थापित याःगु खः ।
पुनः स्थापित प्रतिनिधिसभाय् सरकार गठनया झ्वलय् असमझदारी खनेदयेधुंका ओलीं निक्वःखुसिइ प्रतिनिधिसभा विघटन यानादीगु खः । जेठ ८ गते जूगु निक्वःखुसिइ प्रतिनिधिसभा विघटनया निर्णय नं सर्वोच्च अदालतं असार २८ गते उल्टे यानाबिउगु खः ।
Categorized in राजनीति
