प्रतिनिधिसभापाखें स्वंगू विधेयक स्वीकृत
लहनान्युज | ने.सं. ११३९ बछलागा तृतिया (२१ मे, २०१९), मंगलवाः
प्रतिनिधिसभापाखें थौं स्वंगू विधेयक स्वीकृत जूगु दु । प्रतिनिधिसभाया थौं च्वंगु मुँज्यां बन विधेयक, वातावरण संरक्षण विधेयक व भूमि सम्बन्धि च्याक्वःगु संशोधन विधेयक स्वीकृत जूगु खः । सरकारं म्हिगः सोमवाःया मुँज्याय् टेबल याःगु उगु विधेयकयात कयाः सैद्धान्तिक सहलह जूगु खः ।
वनयात व्यवस्थित यायेगु नितिं उगु विधेयक हःगु सरकारं न्ह्यथंगु दु । सहलहया झ्वलय् बनयात व्यवस्थित दयेकेमाःगु नापं बनपाखें देय् व जनतां फाइदा कायेफइकथं ऐन दयेकेमाःगु सांसदपिन्सं धाःगु दु । निजी वन दर्ता प्रकृया झन्झटं जाःगु धासें उमिसं उकियात सहज दयेकेत सुझाव बियादीगु दु ।
देशया ४४गू प्रतिशत भूभाग वनं जायाच्वंगु जूसां नं सोचय् ह्यूपाः मवःगुलिं व्यवस्थित दयेकेमफूगु सांसदपिनिगु धापू दु ।
विधेयकयात कयाः जूगु सैद्धान्तिक सहलहस सांसदपिन्सं न्यंगु न्ह्यसःया लिसः बियादिसें वन तथा वातावरण मन्त्री शक्ति बस्नेतं वनयात व्यवस्थित दयेकेत हे सरकारं विधेयक न्ह्यःने हयागु धयादिल । न्हूगु पुस्तां नं फाइदा काये फयेमा धकाः उपयोगितायात नं ध्यान बियागु मन्त्री बस्नेताया धापू खः ।
अथे हे ध्वनि, जल व वायु प्रदुषण म्हो यानाः वातावरण स्वच्छ दयेकेत वातावरण सम्बन्धि विधेयक हयागु नं मन्त्री बस्नेतं धयादिल ।
Categorized in राष्ट्रिय
