प्रदेश व प्रतिनिधिसभाया निर्वाचयनया मिति याकन हे घोषण जुइ प्रम देउवा
लहनान्युज | दिल्लागा त्रयोदशी ११३७ (जुलाई २१ २०१७)
प्रधानमन्त्री शेरबहादुर देउवां सरकारं आः यकनं हे प्रदेश व प्रतिनिधिसभाया निर्वाचनया मिति घोषणा यायेगु जुइ धयादिगु दु ।
प्रधानमन्त्री देउवां स्वीन्याक्वःगु बिपी स्मृति दिवसया लसताय् प्रजातान्त्रिक विचार समाजं शुक्रवाः येँय् ग्वसाःग्वःगु ज्याझ्वलय् निर्वाचन क्षेत्र निर्धारणया नितिं आयोग गठन जुइ धुंकुगुलिं सरकार आः मिति क्वःछिइगु व निर्वाचनलिसे सम्बन्धित कानून दयेकेत केन्द्रीत जुइ धकाः धयादिल ।
वय्कलं अप्वः ई मदुसां नं माघ ७ गते न्ह्यः हे प्रदेश व प्रतिनिधि सभाया निर्वाचन याना क्यनेगु दाबी यानादिल । प्रधानमन्त्री देउवां २ नम्बर प्रदेशया निर्वाचनं निगू चरणया चुनावय् कांग्रेस बूगुया क्षतिपूर्ति जुइ धकाः दाबी नं यानादिल ।
वय्कलं न्हापांगु व निगूगु चरणया निर्वाचनय् अन्र्तघातया कारणं पार्टी निगूगु थासय् सीतित जुइमाःगु खः धायादिसे स्वंगूगु चरणया निर्वाचनय् अन्र्तघातया स्थिति वयेके मबिकेगु जुइ धयादिल ।
वय्कलं निर्वाचनय् अन्र्तघात याना पार्टीया उम्मेद्वारयात बुकेत भूमिका म्हितुपिं सकलसित कारबाही यायेगु नं धयादिल । प्रधानमन्त्री देउवां पार्टीदुने कमजोरी दुगु स्वीकार यानादिसे उगु कमजोरी भिंकाः यंकेत थः तयार दु धयादिल । वय्कलं पार्टीदुनेया कमजोरीया बिषयलय् प्रचारबाजी मयायेत असन्तुष्ट पक्षयात इनाप तकं यानादिल ।
