प्रदेश १य् ३०म्ह डिस्चार्ज
लहनान्युज | तछलागा षष्ठी ११४०,जेठ २९ बिहिवाः
बिहीवाः प्रदेश १ य् च्याम्ह संक्रमित थपे जूगु दु सा ३०म्ह डिस्चार्ज जूगु दु ।
धरानया बीपी कोइराला स्वास्थ्य विज्ञान प्रतिष्ठानया आइसोलेसनय् च्वंपि ३०म्हेसित कोरोना भाइरस संक्रमण वासः याका छेँय् लिहा वःगु दु ।
१८ निसे ४५ दँ दुपि ३०म्ह डिस्चार्ज जुगु दु धका प्रतिष्ठान धरानया प्रवक्ता डा.निदेश सापकोटां जानकारी बिःगु दु । डा.सापकोटाया कथं आः अस्पतालय् ३२म्ह वासः याका च्वंगु दु ।
थ्व नाप धरानय् डिस्चार्ज जूपिनिगु ल्याः ९२म्ह थ्यःगु दु । प्रदेश १ पाखे डिस्चार्ज जूपिनिगु ल्याः १५५म्ह थ्यःगु दु ।
बिहीवाः जक झापा, सुनसरी व उदयपुरय् छम्ह मिसा नाप च्याम्ह कोरोना संक्रमण खने दुगु धका प्रदेश १ या सामाजिक विकास मन्त्रालयं जानकारी बिःगु दु ।
प्रदेश १ य् कोरोना संक्रमितपि ३०४म्ह थ्यःगु दु धका प्रदेश १ सामाजिक विकास मन्त्रालयं धाःगु दु ।
