मिडिया काउन्सिल विधेयकयात कयाः देय्न्यंकया पत्रकारत आन्दोलित जुयाच्वंगु इलय् प्रदेश २या सरकारं नं पत्रकारयात छगू करोड तकातक बं पुइकेगुकथंया विधेयक हःगु दु ।

 

आन्तरिक मामिला तथा कानूनमन्त्री ज्ञानेन्द्र यादवं थौं विहिवाः सञ्चार सम्बन्धय् व्यवस्था यायेत दयेकूगु विधेयक प्रदेशसभाय् दर्ता यानादीगु खः । विधेयकय् पत्रकारतय्त आपालं बं पुइकेगु व्यवस्था प्रस्ताव यानातःगु दु ।

 

विधेयकय् प्रदेशया सार्वभौमसत्ता, भौगोलिक अखण्डता वा राष्ट्रियताय् लिच्वः लाइकथंया विषययात कयाः बुखँ च्वगुलिं कसूरया मात्रा स्वयाः ५०गू लखतका निसें १गू करोड तकातक बं पुइकेफइगु प्रावधान तयातःगु दु ।

 

प्रदेशया सार्वभौमसत्ता, भौगोलिक अखण्डता धकाः छु धायेत स्वःगु खः धइगु न्ह्यसलय् प्रदेश २या आन्तरिक मामिला मन्त्री ज्ञानेन्द्रकुमार यादवं चाःचाःहीकाः लिसः बिल । प्रदेशय् लाःगु छुं नं जिल्ला वा क्षेत्र थुगु देशया मखु धकाः प्रचार जुइफइगु जूगुलिं प्रदेशया सार्वभौमसत्ता, भौगोलिक अखण्डताय् लिच्वः वइगु ज्याखँ याइपिन्त कडा दण्ड, बं पुइकेगु प्रस्ताव यानातःगु मामिला मन्त्री यादवं धयादिल ।

 

अथे हे संघीय इकाइ दथुइ दयाच्वंगु स्वापुतिइ लिच्वः लाइगु, थीथी जातजाति, धर्म वा सम्प्रदायया स्वापू स्यंकीगु विषय प्रसारण वा प्रकाशन याःसा छगू लखनिसें न्यागू लखतका बं पुइकेफइगु प्रावधान तयातःगु दु । गाली बेइज्जती याःसा स्वंगूनिसें झिगू लखतका बं पुइकेगु व थुगु कसूरपाखें सुंयात नं क्षति जूसा मनासिव क्षतिपूर्ति याकेगु विधेयकय् न्ह्यथनातःगु दु ।

 

अथे हे सार्वजनिक शिष्टाचार व नैतिकया प्रतिकूल जुइगु विषय, श्रमयात कयाः अवहेलना याइगु व जातीय छुवाछुट नापं लैङ्गिक व सामुदायिक भेदभावयात दुरुत्साहन जुइकथंया बुखँ च्वःसा कसूर याःगु स्वयाः छगू लखनिसें न्यागू लखतका तक बं पुइकेगु व्यवस्था यानातःगु दु ।

 

विधेयकय् प्रदेशया आम सञ्चार माध्यम प्राधिकरण नीस्वनेगु नं व्यवस्था यानातःगु दु । ऐनकथं ज्या जूगु वा मजूगु स्वइगु व कसूर स्वयाः ५०द्वःनिसें न्यागू लखतका तक बं पुइकेफइ ।

 

विधेयक दयेकेगु झ्वलय् मन्त्रालयं सम्बद्ध पक्षलिसे नं सहलह याःगु खः । उगु इलय् दण्ड सजाँय सम्बन्धि थुगु व्यवस्था मदुगु खः ।

 

“थ्व लिपांगु चरणय् वल । जिं नं संवैधानिक समितिइ सहलह यानाः म्हो यायेमाः कि धयागु खः ।” मन्त्री यादवं धयादिल, “थ्व रामायण, गीता मखु । थप सहलह यानाः परिमार्जन यायेफइ ।”