प्रदेश नम्बर २ या प्रदेशसभाय् थौं प्रदेशया नाँ व स्थायी राजधानी क्वजिइत मतदान जुइत्यंगु दु ।

प्रदेशसभाय् थी थी दलतयेसं पेश याःगु नाँ व स्थायी राजधानी सम्बन्धि प्रस्तावय् थौं मतदान यायेगु ज्याधलः दु । सभामुख सरोजकुमार यादवया कजिसुइ गठन जूगु विशेष समिति नं सहमति मुनेत ताःमलायेधुंका मतदानय् वनेगु निर्णय जूगु खः ।

प्रदेशसभाया म्हिगः च्वंगु मुँज्याय् विशेष समितियापाखें प्रतिवेदन पेश याना मू प्रतिपक्षी दल लोकतान्त्रिक समाजवादी पार्टीया प्रमुख सचेतक परमेश्वर साहं गोप्य मतदानपाखें नाँ व स्थायी राजधानीया प्रस्तावयात क्वजिइमाःगु समितिया राय न्यंकादीगु खः ।

२ नम्बर प्रदेशयात  ‘मधेश प्रदेश’, ‘मिथिला भोजपुरा प्रदेश’, ‘जानकी प्रदेश’ व ‘मध्य मधेश प्रदेश’ नाँ तयेमाःगु प्रस्ताव प्रदेशसभाय् विचाराधीन दु  । अथेहे स्थायी राजधानीइ जनकपुरधाम व बीरगञ्ज प्रस्ताव जूगु दु ।

संविधान कथं थुपिं निगुलिं प्रस्ताव ३ब्वया निब्व  बहुमतं पारित जुइमाः । तर प्रदेशसभाय् छुं नं दल वा गठबन्धनया ३ब्वय् निब्व बहुमत मदूगुलिं निगुलिं प्रस्ताव सुथांमलाइगु  खनेदु ।

सत्तारुढ दल जनता समाजवादी पार्टी, नेपाली कांग्रेस व विपक्षी लोकतान्त्रिक समाजवादी पार्टी दथुइ मोर्चाबन्दीया कुतः नं जुयाच्वंगु दु ।

२०७६ चैतय् नं नाँ व राजधानी सम्बन्धि प्रस्तावय् मतदान जुइबलय् ३ब्वय् निब्व मथ्यना सुथांमलाःगु खः ।

Categorized in राजनीति