प्रधानन्यायाधीस नाप १६म्ह न्यायाधीश होम क्वारेन्टाइनय्
मनिष | अनलागा ३ ११४०,असोज १९ सोमवाः
छम्ह न्यायाधीश व कर्मचारीपिन्त कोरोना संक्रमण खनेदेवं प्रधानन्यायाधीश चोलेन्द्र शमशेर जबरा नाप सर्वोच्च अदालतया १६ म्ह न्यायाधीश होम क्वारेन्टाइनय् च्वंगु दु।
सोमवाः निम्ह न्यायाधीश जक सर्वोच्च अदालत वःगु खः। उपि निम्ह न्यायाधीश दुथ्याःगु एकल व संयुक्त इजलास जक मुद्दाया सुनुवाइ याइ।
सर्वोच्च अदालतय् आः १९ म्ह न्यायाधीश दु। उकि मध्ये छम्हेसित जक संक्रमण खने दुगु खः। न्यायाधीश बमकुमार श्रेष्ठ व मनोजकुमार शर्मा बाहेकया १६म्ह न्यायाधीश क्वारेन्टाइनय् च्वना च्वंगु दु। छम्ह न्यायाधीश धाःसा संक्रमणया कारण आइसोलेसनय् च्वना च्वंगु दु।
उपि छु दिं होम क्वारेन्टाइनय् च्वना स्वाब परीक्षण याइ धका धाःगु दु।
संक्रमण खनेदुपि न्यायाधीस नाप मेपि अधिकांश न्यायाधीश छु दिं न्ह्य सर्वोच्च अदालत दुने मंका बैठकय् दुगु खः।
सर्वोच्च अदालतं आइतवाः सूचना जारी यासे छम्ह न्यायाधीश व कर्मचारीपिन्त संक्रमण खनेदुगुलि उपि नाप सम्पर्कय् च्वपि क्वारेन्टाइनय् च्वना च्वंगु धका धाःगु खः।
Categorized in राष्ट्रिय
