प्रधानमन्त्री ओलीं इदुल्ल फित्रया लसताय् भिंतुना सन्देश
लहनान्युज | तछलाथ्व द्धितिया ११३९ (जुन ५ २०१९)
इदुल्ल फित्रया लसताय् प्रधानमन्त्री केपी शर्मा ओलीं इस्लाम धर्मावलम्बीया नखः इदुल्ल फित्रं दक्को धर्म व संस्कृति माने याइपि नेपाःमि दथूइ सौहार्दता व राष्ट्रिय एकता भावना मजबुत जुइगु विश्वास प्वंकादिगु दु ।
इदुल्ल फित्रया लसताय् थौं बुधवाः छगु भिंतुना सन्देश जारी यासे प्रधानमन्त्री ओलीं रमदानया झ्वलय् लच्छि तक याःगु भक्तिं आदर्श जीवनयापनया माग क्यंगु धकाः न धयादिगु खः ।
नेपालया संविधानय् प्रस्तावना हे देशय् बहुजातीय, बहुभाषिक, बहुधार्मिक, बहुसांस्कृतिक व भौगोलिक विविधतायुक्त विशेषतायात आत्मसात् याःगु उल्लेख यासे प्रधानमन्त्री ओलीया सन्देशय् न्ह्यागुहे धर्म व संस्कृति अवलम्बन याइपि हरेक नेपाःमि पिनिगु नागरिकया धार्मिक व सांस्कृतिक जीवनय् हर्षोल्लासया साथ ब्बति काये फइगु अधिकार संविधानय् हे सुनिश्चित जुगु दु धका धयादिगु दु ।
उगु सन्देशय् प्रधानमन्त्री ओलीं देशय् इस्लाम धर्मावलम्बीया धार्मिक स्वतन्त्रता, हकअधिकारयात सुव्यवस्थित नाप सुनिश्चित यायेत संवैधानिक व्यवस्था अनुरुप मुस्लिम आयोग न क्रियाशील जुगु स्मरण यागु दु ।
