शाङ्घाई सहयोग सङ्कठन (एससिओ)या शिखर सम्मेलनया निंतिं चीनया थियानजिनय् झायाच्वनादीम्ह प्रधानमन्त्री केपी शर्मा ओलीं  थौं नानकाइ जिल्लाय् च्वंगु चाउ एनलाई व तेङ यिङ्चाओ स्मृति सङ्ग्रहालयया अवलोकन यानादीगु दु।

चिनियाँ क्रान्तिया नेता चाउ एनलाई चीनया पूर्वप्रधानमन्त्री खः। अवलोकनया झ्वलय् प्रधानमन्त्री ओलीया नाप न्हापांम्ह मिसा राधिका शाक्य, पूर्वउपप्रधानमन्त्री लिसें प्रतिनिधिसभाया दुजः पूर्णबहादुर खड्का, शिक्षा, विज्ञान लिसें प्रविधिमन्त्री रघुजी पन्त, संस्कृति, पर्यटन लिसें नागरिक उड्डयनमन्त्री बद्रीप्रसाद पाण्डे, पूर्वमन्त्री लिसें प्रधानमन्त्रीया आर्थिक लिसें विकास सल्लाहकार डा युवराज खतिवडा, पूर्वमन्त्री लिसें प्रतिनिधिसभाया दुजः छविलाल विश्वकर्मा, परराष्ट्र मन्त्रालयया सचिव अमृतबहादुर राई, चीनया निंतिं नेपाःया राजदूत डा कृष्णप्रसाद ओली, नेपाःया निंतिं चीनया राजदूत छन सङलिसेंया नं ब्वति दूगु खः। चीनया राष्ट्रपति सी चिनफिङया ब्वनाय् शिखर सम्मेलनय् ब्वति कयादीत नेपाली प्रतिनिधिमण्डलया नेतृत्व यानादिसें प्रधानमन्त्री ओली थ्वहे भदौ १४ गते चीन थ्यंक झाःगु खः।

Categorized in राष्ट्रिय