प्रधानमन्त्री ओली कन्हय् नेपाः लिहां झायादीगु
लहना न्यूज | ने.सं. ११३९ ञलाथ्व सप्तमि (५ सेप्टेम्बर, २०१९), विहिवाः
प्रधानमन्त्री केपी शर्मा ओली निवाः ताःहाकः स्वास्थ्य उपचारलिपा कन्हय् शुक्रवाः न्हिनय् नेपाः लिहां झायादीगु जूगु दु ।
प्लाज्मा फेरेसि प्रकृयापाखें म्हय् दुगु एण्टीबडीया उपचारलिपा प्रधानमन्त्री ओली स्वस्थ जूगु वय्कःया सचिवालयं न्ह्यथंगु दु ।
न्हय्गूगु चरणया उपचार प्रकृया म्हिगः बुधवाः क्वचायेधुंकाः प्रधानमन्त्री छन्हु आराम यानाः कन्हय् शुक्रवाः लिहां झायादीत्यंगु खः । प्रधानमन्त्रीलिसें सिंगापुर झायादीपिं मूख्य सल्लाहकार विष्णु रिमाल व निजी चिकित्सक दिव्या सिंह शाह येँय् लिहां झायादीधुंकूगु दु ।
प्रधानमन्त्री ओलीयात नापलायेत सिंगापुर थ्यंकादीम्ह नेपाल कम्यूनिष्ट पार्टीया उपाध्यक्ष बामदेव गौतम व महासचिव विष्णु पौडेल नं कन्हय् शुक्रवाः हे येँय् लिहां झायादी ।
प्रधानमन्त्रीया उसाँय्यात कयाः जानकारी काय्त झायादीपिं नेतातलिसे पार्टीया आन्तरिक विषयस ओलीं ताउत हे सहलह यानादीगु धाःगु दु ।
Categorized in राष्ट्रिय
