प्रधानमन्त्री कपया उपाधि नेपाल पुलिसयात
लहनान्युज | ने.सं. ११३९ तछलाथ्व षष्ठि (८ जुन, २०१९)
प्रधानमन्त्री कप राष्ट्रिय एकदिवशीय क्रिकेट कासाया उपाधि नेपाल पुलिस क्लबं त्याकूगु दु ।
त्रिबिबि क्रिकेट कासाख्यलय् थौं सञ्चरवाः जूगु फाइनल कासाय् विभागीय प्रतिद्वन्दी त्रिभूवन आर्मीयात ४गू विकेटं बुकाः पुलिसं प्रधानमन्त्री कपया स्वंगूगु संस्करणय् निक्वःखुसी उपाधि त्याकूगु खः ।
न्हापांगु संस्करणया फाइनलय् नं थुगु निगू पुचः दथुइ धेंधेंबल्ला जूगु खः । उगु इलय् वा वःगुलिं कासा रद्द जुइवं निगुलिं पुचःयात मंकाःकथं विजेता घोषणा याःगु खः । स्वंगुलिं संस्करणय् फाइनलय् थ्यंगु आर्मी थुगुसी नं उपविजेताय् सीमित जुल । आर्मी थ्व स्वयां न्ह्यःया संस्करणया फाइनलय् एपीएफलिसे बूगु खः ।
टस त्याकाः न्हापां ब्याटिङ्ग याःगु आर्मीं शुरुवात उत्कृष्ट म्हितूगु खः । राजू रिजाल व सोमपाल कामीं हापांगु विकेटया नितिं ७२गू रनया साझेदारी याःगु खः । सोमपालं ४०गू बलय् स्वंगू चौका व निगू छक्काया ग्वाहालिं ३५गू रन व ६०गू बलय् ३२गू रन दयेकूम्ह राजुं ५गू चौका थ्वाःगु खः ।
१६गुगू ओभरया लिपांगु बलय् ललित राजंशीं सोमपालयात आउट यात । मेगु ओभरय् राजु नं आउट जुगू इलय् आर्मी निगू विकेटया क्षतिइ ७२गू रनया स्थितिइ दुगु खः । मध्यक्रमया ब्याट्सम्यानया ब्वज्या निराशाजनक जुइवं आर्मीं मेगु ८गू विकेटया क्षतिइ मुक्कं ५४गू रन जक दयेकेफत । आर्मी ३३.३गू ओभरय् १२५गू रनय् फुक्कं आउट जुल ।
बलिङ्गय् पवन सर्राफया ब्वज्या च्वछायेबहः जुल । वय्कलं ७गू ओभरय् ४गू मेडन तयाः मुक्कं १२गू रन जक बियाः ४गू विकेट काल । अथे हे ललितं ९.३ ओभरय् १गू मेडन तसें ३६गू रन बियाः ४गू विकेट काल ।
लिसलय् पुलिसया नं शुरुवात उलिं बांलाः मजू । ओपनर अनिल कुमार साह २गू रनय् आउट जुइधुंकाः वःम्ह अमित श्रेष्ठं मेम्ह ओपनर सुनील धमलालिसे जानाः ५२गू रनया साझेदारी याःगु खः । सुनीलं १३१गू बलय् २गू चौकाया ग्वाहालिइ नटआउट जुयाः ४२गू रन दयेकेधुंकाः पुलिसं ६गू विकेटया क्षतिइ लक्ष प्राप्त याःगु खः । कप्तान मञ्जित श्रेष्ठ नं ११गू रनय् नटआउट जुल ।
उपाधिया नापनापं पुलिसं २०गू लखतका सिरपाः प्राप्त याःगु खः । उपविजेताय् सीमित जूगु आर्मीं धाःसा १०गू लखतकाय् चित्त बुझय् यायेमाल ।
