निगू विभागिय टिम नेपाल पुलिस क्लब व एपीएफ क्लब प्रधानमन्त्री कप टी–ट्वान्टी राष्ट्रिय क्रिकेट च्याम्पियनसीपया फाइनलय् दुहाँवंगु दु ।

न्हापांगु सेमिफाइनलय् वाग्मती प्रदेशयत ५०गू रनं बुकाः पुलिस फाइनलय् थ्यंकूबलय् स्वंगूगु सेमिफाइनलय् त्रिभुवन आर्मीयात ४७गू रनं बुकाः एपीएफ फाइनलय् दुहाँवंगु खः ।

किपूया त्रिभुवन विश्वविद्यालयया क्रिकेट मैदानय् पुलिसं न्हापां ब्याटिङ यानाः वाग्मतीयात कासा त्याकेबीत सछि व ५६गू रनया लक्ष्य ल्यूगु खः । वाग्मती निर्धारित २०गू ओभरय् ८गू विकेटया क्षतिइ सछि व ५गू रनय् लिकुंगु खः ।

वाग्मतीया आदिल खानं दकले उप्वः २७गू रन दयेकूगु दु । अथेहे, कप्तान ज्ञानेन्द्र मल्लं २३गू रनया योगदान ब्यूगु दु । पुलिसया दीपेन्द्रसिंह ऐरीं दकले उप्वः न्यागू विकेट काःगु दु ।

निगूगु सेमिफाइनलय् एपीएफं आर्मीयात कासा त्याकेबीत २सः व ३१गू रनया लक्ष्य ल्यूगु खः । लक्ष्य लीगु झ्वलय् आर्मीं ९गू विकेटया क्षतिइ सछि व ८३गू रनय् लिकुनेमाल । आर्मीया नितिं राजेश पुलामीं ३८गू अले भिम सार्कीं ३५गू रन दयेकूगु दु ।

एपीएफया नितिं शरद भेषावकरं स्वंगू विकेट काःगु खः । थ्वसिवे न्ह्यः, टस बुनाः न्हापां ब्याटिङ याःगु एपीएफं निर्धारित २०गू ओभरय् २गू विकेटया क्षतिइ २सः व ३०गू रन दयेकूगु खः ।

एपीएफया नितिं आसिफ शेखं दकले उप्वः ८४गू रनया योगदान ब्यूगु दु । लोकेश बम केवल १८गः बलय् ६६गू रन दयेकाः अविजित जूगु दु । प्रदिप ऐरीं ५७गू रन दयेकूगु दु ।

Categorized in कासा