प्रधानमन्त्री दाहाल भारत प्रस्थान
प्रधानमन्त्री पुष्पकमल दाहाल प्रचण्ड भारतया गोवाय् जुइगु ब्रिक्स  सम्मेलनय् ब्वति कायेत थौं सुथय् भारतपाखे झाःगु दु ।
 
प्रधानमन्त्री दाहाल १८ दुजःया नेपाली प्रतिनिधिमण्डलया नेतृत्व यासें थौं उखेपाखे झाःगु खः । प्रधानमन्त्रीया नेतृत्वय् वंगु भ्रमण दलय् प्रधानमन्त्री दाहालया जहान सीता दाहाल, परराष्ट्रमन्त्री डा महत, परराष्ट्र सचिव शङ्करदास वैरागी, प्रधानमन्त्री अले मन्त्रिपरिषद् ज्याकूया सचिव टङ्कमणि शर्मा लिसेंयापिं दुथ्यानाच्वंगु दु ।  
 
प्रधानमन्त्री प्रचण्डं बिमस्टेक दुजः राष्ट्रया राष्ट्र सरकार प्रमुखया मुँज्या अले  ब्रिक्स विमस्टेक आउटरिच सम्मेलनयात सम्बोधन यानादीगु ज्याझ्वः दु ।
 
सम्मेलनया झ्वलय् गोवाय् प्रधानमन्त्री प्रचण्डं चिनियाँ राष्ट्रपति सि जिन पिङ व भारतीय प्रधानमन्त्री नरेन्द्र मोदीलिसे निगूपक्षीय वार्ता यानादीगु ज्याझ्वः दु ।  चिनियाँ राष्ट्रपतियात नापलानाः प्रधानमन्त्री प्रचण्डं नेपाल भ्रमणया लागिं हाकनं इनाप याइगु धाःगु दु । 
 
परराष्ट्र मन्त्रालयया कथं चीनया राष्ट्रपति सियात सन्चरबाः सनिलय् व भारतीय समकक्षीयात आइतबाः नापलानादीगु ज्याझ्वः दु । सम्मेलन न्ह्यः जुइगु Bay of Bengal initiative for Multi-Sectoral Technical and Economic Corporation (बिमस्टेक) दुजः राष्ट्र अले सरकार प्रमुखया रिट्रिट मुँज्याय् नं प्रधानमन्त्री प्रचण्डं ब्वति कयादी ।
 
 
उकथं हे रुसया राष्ट्रपति भ्लादिमिर पुटिन, श्रीलङ्काया राष्ट्रपति मैत्रीपाल श्रीसेना, दक्षिण अफ्रिकाया राष्ट्रपति जाकोब जुमा, ब्राजिलया राष्ट्रपति मिसेल टेमर व भुटानया प्रधानमन्त्री छिरिङ तोब्गेयात नं नापलायेगु ज्याझ्वः दु् । प्रधानमन्त्री प्रचण्ड वइगु कार्तिक १ गते देशय् लिहांझाइगु ज्याझ्वः दु ।
 
Categorized in राजनीति