प्रहरीं पत्रकारयात दागुया बिरोधय् रंगशालाय् प्रदर्शन
लहनान्युज | थिंलाथ्व चर्तुदशी ११४० (दिसेम्वर ११ २०१९)
१३ क्वःगु दक्षिण एसियाली खेलकुद (साग) या समापनय् दिं मंगलवाः सुथय् समाचार संकलन यायेगु झ्वलय् नागरिक दैनिक तथा नेपाल खेलकुद पत्रकार मञ्चया सदस्य सुमन चापागाई यात नेपाल प्रहरीपाखे जुगु अभद्र व्यवहारं नेपाल खेलकुद पत्रकार मञ्चपाखे घोर भत्र्सना याउगु दु ।
राष्ट्रिय खेलकुद परिषद् (राखेप) या मू लुखाँय् न्ह्यने किपा कायेगु झ्वलय् पत्रकार चापागाईयात नेपाल प्रहरीं अपशब्द छ्यला जथाभावी बुट प्रहार याउगु धकाः धाउगु खः ।
घाइते चापागाईयात ब्लुक्रस अस्पतालय् वासः याका च्वंगु दु । वइत छाती व छ्यनय् घाःलागु खः ।
मञ्चपाखे छगु प्रेस विज्ञप्ति पिथना पत्रकारयात याउगु उगु घटनां नागरिक अधिकारया नाप निर्वाध रुपं समाचार संकलन व सम्प्रेषण याये दइगु न्युनतम लोकतान्त्रिक अधिकार तक हनन जुगु धाःसे मञ्चं घटनाय् संलग्न जुपिन्त तत्काल कारवाही यायेत माग याउगु दु । नाप पत्रकार सुमनया याकन लायेमा धका न कामना याउगु दु ।
