२०८० चैत्र १६, शुक्रबार

प्रिमियर लिगय् चेल्सीं लिभरपुलयात ज्वलिंज्वः यात

गुंलागा सप्तमी ११४१, भाद्र १३ आईतवाः

इंग्लीश प्रिमियर लिग फुटबलय् चेल्सीं लिभरपुलयात ज्वलिंज्वः यानाब्यूगु दु । वंगु चान्हय् लिभरपुलया मैदानय् जूगु कासाया २२गूगु मिनेटय् काइ हाभर्ट्जं गोल यानाः चेल्सीयात अग्रता बिइकूगु खः ।
 
न्हापांगु हाफया इन्जुरी ईलय् चेल्सीया रिस जेम्सं डि बक्सदुने ह्याण्ड यायेवं वय्कयात रेड कार्ड नकाः मैदानं पित्यनेवं टिमय् १०म्ह जक कासामिइ सीमित जूवंगु खः । अनलिं पेनाल्टी थ्वायेगु ह्वःताःयात मोहोमद सालाहं गोलय् हिलाःबीवं कासा १गू–१गू गोलया ज्वलिंज्वःनाप क्वचाःगु खः ।
 
प्रिमियर लिगया मेगु कासाय् म्यान्चेस्टर सिटीं आर्सनलयात ५–० गोलं बुकूगु दु । एकतर्फी कासाय् सिटीयात त्याकेबीत फेरान टोरेसं निगोल याःबलय् इके गुन्डोगान, रोड्री व ग्याब्रियल जिससं छगोल छगोल याःगु खः ।
 
प्रिमियर लिगया मेमेगु कासाय् एभर्टनं ब्राइटनयात २–० गोलं बुकूबलय् लेष्टर सिटीं नरिच सिटीयात २–१ गोलं बुकूगु खः ।
 
अथेहे न्युकासल युनाईटेड व साउथह्याम्प्टन अले वेष्ट ह्याम युनाईटेड व क्रिष्टल प्यालेसं २–२ गोलया ज्वलिंज्वः म्हितूगु दु । प्रिमियर लिगय् थौं स्वंगु कासात जुइ ।
 
थौं चान्हय् म्यान्चेस्टर युनाईटेडं वुल्भर ह्याम्पटनलिसे म्हितीबलय् टोटनह्याम हट्सपर व वाट्फोर्ड अले बर्नले व लिड्स युनाईटेडदथुइ धेंधेंबल्ला जुइ ।
Categorized in कासा