इंग्लीश प्रिमियर लिग फुटबलय् म्यान्चेस्टर युनाइटेडं बर्न्लेयात ३गू–१गू गोल अन्तरं बुकुगु दु ।

वंगु चान्हय् थःगु हे मैदानय् जूगु कासाय् म्यान्चेस्टर युनाइटेडयात त्याकेत स्कट म्याक्टोमिने व क्रिश्चियानो रोनाल्डों छगू छगू गोल याःबलय् बर्न्लेया बेनीं छगू आत्माघाति गोल याःगु खः ।

बूगु टोली बर्न्लेया नितिं आरोन लेनन्ं छगू गोल याःगु खः । वंगु चान्हय् हे जुइमाःगु एभर्टन व न्युकासल युनाइटेड दथुया कासा धाःसा कोभिडया हुनिं पोस्टपोन्ड यायेमाःगु दु ।

वंगु चान्हय्सिया कासालिपा म्यान्चेस्टर युनाइटेड प्रिमियर लिगया ल्याः धलःया ६गूगु थासय् थाहाँवंगु दु । १८गू कासां उमिगु ३१गू ल्याः जूगु दु ।

उतिग्यंक ३१गू ल्याः लिसें वेष्ट ह्याम युनाइटेड ५गूगु थासय् दु । लिगय् २०गू कासापाखें ५० गू ल्याः मुंकुगु म्यान्चेस्टर सिटी शिर्ष थासय् दूबलय् ४२ गू ल्याः लिसें चेल्सी निगूगु थासय् दु ।

छगू कासा म्हो म्हितुगु लिभरपुल व आर्सनल छसिकथं ४१गू व ३५गू ल्याः लिसें ३गूगु व ४गूगु थासय् दु ।

Categorized in कासा