२०८० चैत्र १६, शुक्रबार

प्रेमध्वज संगीत प्रतिष्ठान स्थापना जुइगु

लहनान्यूज | पोहेंलागा आमै ११३७ (जनवरी २७ २०१७)

संस्कृति, पर्यटन तथा नागरीक उड्डयन मन्त्री जीवनबहादुर शाहिं गोल्डन भ्वाइस अफ नेपाल प्रेमध्वज प्रधानया नामं प्रेमध्वज संगीत प्रतिष्ठान गठन यायेत पहल यायेगु धयादीगु दु ।
 
लहना मिडियाया ग्वसालय् येँय् क्वचाःगु ‘यूएफओ भिन्तुना सनिल’ ज्याझ्वलय् म्येहालामि प्रधानयात सम्मान लःल्हासें मन्त्री शाहिं संगीतया माध्यमं मदिक्क नेपाःया सेवा यानाच्वंम्ह प्रधानया नामय् प्रतिष्ठान याये हे माःगु धयादीगु खः । शाहिं नेपालय् रक एन्ड रोल संगीत दुतहयेगु निसें भारतय् हे च्वनाः म्ये हालेगु व्हःताःयात तकं त्वःताः नेपाली संगीत ख्यःयात हे कर्मक्षेत्र दयेकाः थःगु मातृभूमिप्रति म्येहालामि प्रधानं क्यनादीगु मतिनायात च्वछानादिल ।
 
लहना मिडियां न्हूदँ ने.सं. ११३७ या लसताय् याःगु प्रेमध्वज प्रधानया हना लिसें सांगितिक ज्याझ्वलय् मन्त्री शाहिं प्रधानयात हनापौ लःल्हासें हनादिल । अथे हे जनगायक भृगुराम श्रेष्ठं स्वांमाः कोखायेकादिल सा समाजसेवी लक्ष्मीदास मानन्धरं दोसल्लां न्ययेकादिल ।
 
नगद सम्मान कथं सम्मानित प्रधानयात यूएफओ क्लोडिङ स्टोरपाखें ५१,१११ तका लःल्हाःगु खः । यूएफओया ब्रान्ड मेनेजर सचिन श्रेष्ठ व हरि न्यौपानें प्रधानयात चेक लःलहानादीगु खः ।
प्रधानयात हनेगु झ्वलय् लहना मिडिया सकल दुजः लिसें सकल कलाकारपिन्सं नं खादां न्ययेकूगु खः । हना स्वयां न्ह्यः वरिष्ठ म्येहालामि प्रेमध्वजलिसें मन्त्री शाहि व ज्याझ्वःया विशिष्ट पाहां व पाहांपिन्त नेवाः परम्परा कथं ख्येँय् सगं ब्यूगु खः ।
 
 
सम्मान लःल्हाना कायेधुंकाः म्येहालामि प्रधानं नेवाः ख्यःपाखें थः दक्कले न्हापां सम्मानित जुइखंगु धयादीगु खः । नेवाः ख्यलं थःत थुकथं सम्मान याःबलय् थः तसकं लयताःगु धयादीगु खः ।
 
सन् १९३८ जुन ६स चौतारा सिन्धुपाल्चोकय् बूम्ह वरिष्ठ म्येहालामि प्रेमध्वज प्रधानंं बालाबालाचिंगु मिखा म्येलिसें नेपालय् रक एन्ड रोल संगीत दुत हयादीगु खः । लिसें भारतया सिने क्षेत्रया प्रतिष्ठित फिल्मफेयर अवार्डया न्हयक्वःगु संस्करणय् भ्वाइस अफ नेपाल उपाधिं सम्बोधित जुयाः म्ये तकं हालादीधुंकूगु दु ।
 
उगु इलय् प्रधानयात भारतय् हे च्वनाः हिन्दि संकिपाया नितिं म्ये हालेत इनाप यातं तकं वयकः नेपालय् हे च्वनेगु धकाः लिहां झाःगु खः ।
 
सिजि ब्रुअरी नेपाल प्रा. लि. इभेन्ट पार्टनर जुयाच्वंगु यूएफओ भिन्तुना सनिल ज्याझ्वलय् म्येहालामि ज्योति घिमिरे, भीम तुलाधर, जेम्स प्रधान, जेम्स प्रधान, निशा देसार, सुरजवीर बज्राचार्य, एञ्जिला सिंह, सुलिन्द्र शाक्य, अन्जन श्रेष्ठ, पंकज राजोपाध्याय, भूपेन्द्र बज्राचार्य, निशान्त गौचनं म्ये हालादीगु खःसा आराध्यलक्ष्मी खड्गीं हुलाप्याखं न्ह्यब्वयादीगु खः ।
Categorized in राष्ट्रिय