'प्रोफेसनालिज्मया विकास यायेमाःगु खनेदु'
सिल्लाथ्व एकादशि ११३७ (फेब्रुअरी ७ २०१७)
अन्जन श्रेष्ठ । संगीत ख्यलय् छम्ह न्हूम्ह अले ल्यायम्हम्ह म्येहालामि । नेवाः संकिपा तिन तिकः महाबिकःया वयकलं हालादीगु म्ये ‘थौंया दिं, खुसिया दिं’ थौंकन्हय् तसकं लोकं व्हानाच्वंगु दु । लहना मिडियाया ग्वसालय् क्वचाःगु गोल्डन भ्वाइस प्रेमध्वज प्रधानया हना लिसें न्हूदँ नेपाल सम्वत ११३७ या लसताय् सांगितिक भिन्तुना कालबिल ज्याझ्वः ‘भिन्तुना सनिल’स वयकलं ˞यापर पंकज राजोपाध्याय व बिटबक्सर निशान्त गौचनलिसे छगू विशेष न्ह्यब्वया कथं प्रेमध्वज प्रधानयात सांगितिक सम्मान नं देछानादीगु खः, गुगु न्ह्यब्वया ज्याझ्वःया स्वकुमिपिन्सं अतिकं हे ययेकूगु खः । वयकः अन्जन श्रेष्ठलिसे जूगु खँल्हाबल्हा :
भिन्तुना सनिल ज्याझ्वःया अनुभव गुकथंया जुल ?
जिगु नितिं तःधंगु हे सम्मान थें ताल । थुगु ज्याझ्वलय् जिपिं थज्याःपिं ल्यायम्हतयत तःधंगु हे दबू ब्यूगु थें ताल । ज्याझ्वलय् जिमित नं प्रेमध्वज दाईयात हनेगु, वयकःया न्ह्यःने दनाः म्ये हालेगु व्हःताः बिल, ज्योति घिमिरे, भीम तुलाधर, जेम्स प्रधान थुज्वःपिं कलाकारपिं नापं म्ये हालेखन । थुगु व्हःताः ब्यूगुलिं जिमिगुपाखें लहना मिडियायात यक्व यक्व हे सुभाय् दु ।
प्रेमध्वज दाईयात सांगितिक सम्मान कथं छिकपिन्सं विशेष म्ये न्ह्यब्वयादिल । व म्येयात उकथंया विशेष दयेके धइगु बिचाः गुकथं पिदन व तयार यायेत गुलित थाकुल ?
थ्व टिमवर्कया रिजल्ट खः । संगीतया छुं नं दबुलिइ छगू न्हूगु कथंया म्ये न्ह्यब्वयेगु धइगु बिचाः ला जिमिसं न्हापा हे दयेका च्वनागु खः । तर उकिया नितिं दबू हे चूमलानाच्वंगु धायेमाली ।
लहनाया थुगु ज्याझ्वःया खँ वयाकथं पासापिं च्वनाः व कथंया म्ये थन हे याये धयागु खँ जुल । व हे कथं जिमिसं ज्या याना । उकीया नितिं जिमिसं निवाः पूवंक हे मदिक्क ज्या याना ।
छगू न्हूगु कथंया याये, छुं बिस्कं कथंया याये धकाः बिचाः यानाः जिमिसं उगु विशेष म्ये दयेका । गुलि थाकुल धइगु ला बिचाः हे मयाना । न्हूगु कथंया सवाः बीमाः धयागु जक बिचाः यानाः ज्या याना ।
स्वकुमिपिनिगु पाखें गज्याःगु प्रतिक्रिया वल ?
स्वकुमिपिनिगु खँ न्यनेबलय् पुलांगु म्येयात छगू हे जक पहलं मखु, न्हूगु कथं नं हालेफइ खनी, न्हून्हूगु प्रयोग यानाः नं बांलाके ज्यू खनी धइगु कथं काःगु खनेदत ।
न्हापा ला छगू ग्याःचिकु दुगु खः । नेवाः ज्याझ्वलय् दक्कले न्हापांगु खुसी ह्यूमन बिटबस्क जुयाच्वंगु दु, राजमति कुमति म्येय् ˞याप दुथ्यानाच्वंगु दु । थ्व ला पूवंक हे छगू एक्सपेरीमेन्टल खः ।
जिपिं तसकं ग्यानाच्वंगु खः, मनूतयसं ययेकी ला मययेकी ला धकाः । तर जब जिपिं म्ये हालाः दबुलिं कुहांवया, मनूतयसं बांलाः धाःबलय्, सकसिनं च्वछाःबलय् तसकं हे लयताल ।
पंकज व निशान्त गुकथं नापलाःगु खः ?
पंकज ला जि मचाबलयनिसेंयाम्ह पासा खः । जिपिं मचाबलयनिसें हे नापनापं जुयापिं खः । आः जिपिं डबल एक्सएल धकाः छगू पुचः जुयाः हे म्यूजिक ख्यलय् नं ज्या यानाच्वना ।
निशान्तयात धाःसा ८दँ/९दँ न्ह्यः टिभिइ स्वयेगु यानाच्वनागु खः । छगू सांगितिक ज्याझ्वलय् जिपिं नापलात । अले औपचारीक रुपं खँल्हाबल्हा जुल ।
लिपा इलयब्यलय् नापलाइगु अले म्यूजिकया बारे खँ जुइगु जुयावन । न्ह्याब्लें नं जिमि दथुइ छुं न्हूगु यायेमाः धयागु ल्याखं खँ जुइगु । व धुंकाः जिपिं नापनापं ज्या नं यानावना ।
छि संगीत ख्यलय् गुकथं लाःवःगु खः ले ?
म्ये हालेगु इच्छा ला मचाबलयनिसें हे दुगु खः । जि स्कूबलय् ब्वनाबलय् नं रामेश श्रेष्ठ सरं छं म्ये हालीगु बांलाः धायेगु यानाद्यू अले वयकःलिसे थीथी ज्याझ्वलय् म्ये नं हाःवना, स्कूलया ज्याझ्वलय् नं म्ये हाला । जिगु न्हापांम्ह गुरु हे वयकः खः ।
लिपा वनाः तालिम नं कया । क्लासिकल नं सयेका, क्लासिकालयात आधुनिक मिक्स यानाः म्ये दयेकेगु बिचाः पिदन । व हे कथं क्लासिकय् आर एन्ड बि मिक्स यानाः दयेकास्वया । थुकथं हे बुलुहुं संगीत ख्यलय् पलाः न्ह्याकायंका ।
थौंकन्हय् म्ये हालेगु लिसें विज्ञापनत नं यानाच्वनागु दु । जिगु चीधंगु रेकर्डिङ स्टुडियो नं दु, मेपिनिगु म्ये रेकर्डिङ नं यानाच्वनागु दु । संकिपाय् पाश्र्व संगीत नं बियाच्वनागु दु । उकिया नापं च्वयेगु नं याना । थौंकन्हय् जि पूवंक हे संगीतयात हे ई बियाच्वनागु दु ।
च्वयेगु, लय् तयेगु, संगीत संयोजन, गायन, रेकर्डिङ दक्वं यायेबलय् थाकु मजूला ?
थाकूगुया खँ ल्हायेबलय् बिचाः याःसा थाकु । तर यायां वनेबलय् तसकं अःपु खनी । बिचाः यानाच्वनेबलय् अहो, थ्व नं यायेमानि, व नं यायेमानि । तर ज्या यायेबलय् अथेंं हे थःथम्हंतुं दक्वं अःपुया वं ।
थ्व दक्वं पक्ष थवंथवय् चिनाच्वंगु, स्वानाच्वंगु दुगु जुल । अथेजूगुलिं जितः ला तसकं अःपु हे ताः ।
थुगु ख्यलय् थःगु ज्याय्, छि गुलितक्क सन्तुष्ट दु वा मदु ?
जि थःगु ज्याय् पूवंक हे सन्तुष्ट दु । जिं श्रृजना यानाच्वनागु दु । जि ज्या यायेबलय् गबलें गनं कमजोरी जुइफु, गबलें च्वय् गबलें क्वय् नं जुइफु । व धयागु जुयाच्वनी । तर थःगु ज्याय् जि पूवंक हे सन्तुष्ट दु ।
संगीत ख्यलय् जुइत छेँयापाखें गज्याःगु सपोर्ट दु ले ?
छेँय् न्हापा ला जितः सपोर्ट मयाःगु खः । नेपालय् संगीतया बजाः मदु धाइगु खः । थुकियात सौंखया रुपय् जक का धायेु याइगु खः । तर आः स्थिती पायेधुंकल । जिं गुलि नं थःगु निजि वा छेँया खर्च याना, व दक्वं संगीत ख्यलं हे कमे यानाः यानाच्वना ।
नेपाःया संगीत ख्यलय् यक्व हे एक्पेरिमेन्ट जुयाच्वंगु दु, ह्यूपाः वयाच्वंगु दु । नेवाः संगीत ख्यलय् खास हे ह्यूपाः वःगु थें खनेमदुनि ?
जिगु व्यक्तिगत बिचाः धायेगु खःसा नेवाः म्येत नं न्हापा स्वयां ला आः यक्व हे स्तरीय जुयावःगु दु । तर सुधार जुइमाःगु पक्षत नं मदुगु ला मखु । नेवाः संगीत ख्यःया पहःचहलय् ह्यूपाः वयेमाःगु खनेदु ।
थः यःम्ह, वा थःम्ह धकाः मखु, सःम्ह मनूयात ज्या याकेबीमाः । सौंख दु वा धेबा दु धायेवं मसःगु ज्या यानाः वा मसःपिन्त ज्या याकां ला उकी बांलाःगु लिच्वः पिहां वइमखु । स्तरयात बिचाः यायेमाल अले स्तर दयेकेत गुलिं खँय् थः यःगु वा थःगु स्वयां पिने नं वनेमाली । नेवाः संगीत ख्यलय् क्वालिफाइड मनूत न्ह्यःने वये मफयाच्वंगु थें ताः जितः ।
नेवाः संगीत ख्यलय् प्रोफेसनालिज्मया विकास यायेमाःगु खनेदु । सुयाके छु गुण दु, व हे ज्या यायेमाः । थः यःम्ह, वा थःम्ह धकाः मखु सःम्ह मनूयात ज्या याकेबीमाः । प्रोफेसनयात इज्जत ब्यूसां प्रोफेसनं नं थःपिन्त इज्जत बी नि ।
नेवाः संगीत ख्यलय् मेकिंगया खँय् पुलांगु हे पहःचहःयात जक लिनाच्वन धाइपिं दु नि ?
थ्व खँ पूवंक खः थ्यंक नं धाये ला मछिं । न्हून्हूगु प्रयोग यानाच्वंपिं नं दु । तर पुलांगु पहःयात त्वःते हे मज्यू धाइपिं नं आपाः हे दुगु नं खः । आःतक्क नं नेवाः म्ये धालकि पुलांगु हे पहःया दयेकेमाःगु, पाश्चात्य बाजं छ्यले मज्यूगु, भिडियो दयेकलकि पुलांगु छेँ अले हाकु पतासि जक क्यनेमाःगु कथंया मानसिकता यक्व हे दनि । उकिं पिहां वयेमाः धकाः बिचाः याइपिं म्ह्वः जुयाच्वन ।
अज्याःगु नं माः । झीगु पुलांगु मौलिक संस्कृति क्यनीगु कथंया नं माः । तर प्रयोग नं याना वनेमाः । थ्व याये मफइगु नं मखु, यायेफइ । जि व पंकज जानाः नं, निशान्तलिसे नं न्हून्हूगु कथंया म्ये पिकायेत स्वयाच्वनागु दु । पुलांगु पुस्तानिसें न्हूगु पुस्ता सकसितं बिचाः यायेमाः ।
दक्कले लिपा लहनाया ब्वँमियात छु धयादी ?
संगीतया छुं हे भाय् दइमखु । न्यनेत न्ह्याग्गु संगीत नं न्यनादिसँ । उकी बांलाः ताःगु नेवाः कलाकारतलिसे इनादिसँ । मेमेगु म्येलिसें नेवाः संगीत न्यनादिसँ, नेवाः पत्रिका ब्वनादिसँ । सुभाय् ।
थुगु अन्तर्वार्ता नं ब्वनादिसँ
