फिलिपिन्सय् सैन्य विमान दुर्घटना
बछलागाः एकादशी ११४१, असार २१ गते सोमबाः
दक्षिणी फिलिपिन्सय् सैन्य विमान दुर्घटना जूबलय् म्ह्वतिं ४५ सीगु दु ।
दुर्घटनाय् मेपिं तःम्ह हे घाःपाः जूगु दु । विमानय् ९० गयाच्वंगु दुगु बीबीसीं धाःगु दु । सुरक्षाकःमितय्सं विमानया भग्नावशेषं म्ह्वतिं ४५ म्हेसिया सीम्ह लिकाःगु दु ।
दुर्घटनाय् ४० म्हेसित जिवित हे उद्धार याःगु दुसा न्याम्ह अझं बेपत्ता हे तिनि । देय्या दक्षिण पश्चिमय् लाःगु सुलु प्रान्तया जोलो टापुइ अवतरण यायेगु झ्वलय् उगु विमानं धावनमार्ग ज्वनेमफुबलय् दुर्घटना जूगु अनया अधिकारीतय्सं धाःगु दु ।
मदुपिंमध्ये अप्वः धइथें सैनिक लाःगु दु । उगु विमानय् दुपिं सैनिकतय्त दक्षिणी फिलिपिन्सय् दुगु विद्रोही पुचः अबु सयाफविरुद्ध कारवाहीया लागिं छ्वःगु खः ।
Categorized in अन्तर्राष्ट्रिय
