फिल्म सोसाईटीं संकिपा नखः याइगु
लहनान्यूज | दिल्लाथ्व द्वादशी ११३७ (जुलाई ५ २०१७)
नेवाः फिल्म सोसाईटीं निगूगु नेवाः संकिपा नखःया लिसें संकिपाकःमि सम्मान ज्याझ्वः येँय् याइगु जूगु दु ।
सोसाईटीया ग्वसालय् येँय् क्वचाःगु ‘नेवाः संकिपाया आलेख (स्क्रीप्ट) च्वज्या’ विषयक निन्हुया तालीमया समापन ज्याझ्वलय् न्वःवासें सोसाईटीया नायः लुःजः सिंहं न्हूदँ ने.सं. ११३८ या लसताय् मोहनि ताकाय् संकिपा नखःया ग्वसाः ग्वयेगु धयादिल ।
थगुने धरानय् जूगु संकिपा नखःया निगूगु संस्करणय् थुगुसी धाःसा नखलय् दुथ्याःगु संकिपायात सिरपाः नं बीगु सिंहं धयादिल । लिसें उगु हे नखलय् निम्ह संकिपाकःपिन्त एनएफएस संकिपा सम्मानपाखें सम्मानित नं यायेगु धयादिल ।
आदिवासी जनजाति चलचित्र महासंघया नायः अमृत सुनुवारं जनजाति संकिपा ख्यःया विकासया लागिं सकल जनजाति संकिपाकःमिपिं हे जायेमाःगुलिइ बः बियादिल । नायः सुनुवारं वर्तमान इलय् चलचित्र विकास बोर्डपाखें जनजाति संकिपाकःपिनिगु छुं छुं मागया सम्बोधन याःसां अझं यक्वं समस्यात ल्यं दनिगु धयादिल ।
भाय् व तजिलजि हे मथूगु समुदायया मनूत दुगु सेन्सर बोर्डं जनजाति संकिपाय् कैंचीं चायेगु ज्या यानाच्वंगु सुनवारया धापू खः । राज्यं जनजाति अनुकुल निती मदयेकूतल्ले जनजाति संकिपा ख्यःया बृहत्तर विकासया लागिं थःपिं संघर्ष यानाच्वनेगु नं नायः सुनुवारं धयादिल ।
नेवाः देय् दबूया नायः नरेश ताम्रकारं देयन्यंकया नेवाः संकिपाकःमिपिनिगु छगू हे मंकाः दबू दयकाः न्ह्याःवनेमाःगु धयादिल ।
थीथी क्षेत्र व भूगोलय् न्यनाः देयया लिसें विदेशय् तकं च्वनाच्वंपिं नेवाः संकिपाकःमिपिं संगठित जुयाः न्ह्याःवंसा नेवाःया लिसें सकल जनजाति समुदायया सांगठनिक विकासय् तकं तिबः जुइगु नायः ताम्रकारया धापू खः ।
नेवाः संकिपाया स्तर थकायेगु नितिं धकाः दिल्लाथ्व एकादशि व द्वादशी (जुलाई ४ व ५) स जूगु निन्हुयंकया तालीमय् विशेषतः नेवाः संकिपाया लिसें आदिवासी संकिपाया आलेख च्वज्याया विषयस तालीम ब्यूगु खः ।
तालीमया न्हापांगु दिनय् संकिपाकःमि लिसें स्क्रीप्ट लेखन प्रशिक्षक अनुप सुवेदीं संकिपाया क्रीप्ट च्वयेगु शैली व थुकिया सैद्धान्तिक, व्यवहारिक पक्षया बारे प्रशिक्षण बियादीगु खः।
निन्हुगु दिनय् वरिष्ठ सिने पत्रकार लिसें संकिपा निर्देशक विजयरत्न असंबरें नेपालभाषाया संकिपाया स्क्रीप्टय् न्ह्याना वयाच्वंगु ट्रेन्डया बारे जानकारी ब्युसें थुकिया कमी, कमजोरी, भिंकेमाःगु पक्ष अले स्तरीयताको बारे विश्लेषणात्मक प्रशिक्षण बियादिल ।
निन्हुगु हे दिनय् वरिष्ठ आदिवासी जनजाति संकिपाकःमि नबीन सुब्बां आदिवासी जनजाति संकिपाया स्क्रीप्ट च्वयेबलय् ध्यान बीमाःगु पक्षया बारे प्रशिक्षण ब्युसें अन्तर्राष्ट्रिय जनजाति संकिपा ख्यलय् जुया वयाच्वंगु अभ्यासया बारे नं जानकारी बियादीगु खः ।
उगु हे दिनय् कार्यशालाया समापन ज्याझ्वः नं यानाः प्रशिक्षार्थीपिन्त दसिपौ नं लःल्हाःगु खः । प्रशिक्षार्थीपिन्त नेवाः देय् दबूया नायः नरेश ताम्रकार व आदिवासी जनजाति चलचित्र महासंघया नायः अमृत सुनुवारं दसिपौ लःल्हानादिल ।
तालीमय् थीथी संघसंस्थाय् आवद्धलिसें स्वतन्त्र रुपं नेवाः संकिपा ख्यलय् सक्रिय संकिपाकःमिपिनिगु ब्वति दुगु खः ।
