फुक्क कथंया विभेदयात हानिसें लिनाछ्वयेगु सकसिगु मंकाः दायित्व
लहनान्युज | ने.सं. ११३९ तछलाथा पञ्चमि (२२ जुन, २०१९), सञ्चवाः
राष्ट्रपति विद्यादेवी भण्डारीं थौंकन्हय् दयाच्वंगु फुक्क कथंया विभेदयात हानिसें लिनाछ्वयेगु सकसिगु मंकाः दायित्व जूगु धयादीगु दु ।
सप्तरीया डाकनेश्वरी नगरपालिकाया तरहीइ च्वंगु जनता माध्यामिक विद्यालयया हिरक जयन्तीया झ्वलय् थौं सञ्चरवाः ग्वसाः ग्वःगु ज्याझ्वःयात सम्बोधन यानादिसें राष्ट्रपति भण्डारी अथे धयादीगु खः । वय्कलं देय् दयेकेगु ज्या मंकाः राष्ट्रिय ज्याखँ जूगुलिं फुक्कस्यां थःथःगु थासं योगदान बीमाःगु खँय् बः बियादिल ।
अथे हे प्रदेश २ सरकारं न्ह्याकाच्वंगु ‘बेटी बचाउ, बेटी पढाउ’ अभियानयात च्वछायादिसें राष्ट्रपति भण्डारीं उगु ज्याझ्वः मिसापिनिगु हितय् दुगुलिं ताःलाकेत फुक्क पक्ष न्ह्यज्यायेमाःगु खँय् नं बः बियादीगु दु । वय्कलं माःकथंया पूर्वाधारलिसंया स्वास्थ्य केन्द्र विस्तार यानाः जनतायात सहजकथं स्वास्थ्य सेवाया उपलब्धताया सुनिश्चितता यायेत नं इनाप यानादिल ।
ज्याझ्वलय् उपप्रधान, स्वास्थ्य तथा जनसंख्या मन्त्री उपेन्द्र यादवं शिक्षा व स्वास्थ्य मदयेकं देशया समृद्धि जुइमफइगु जूगुलिं विकासया न्हापांगु आधार शिक्षा व स्वास्थ्य क्षेत्रया विकासय् न्ह्यज्यायेमाःगु फुक्कसिग दायित्व जूगु धयादिल । वय्कलं निःशुल्क शिक्षा व आधारभूत स्वास्थ्य सेवा निःशुल्क यायेगु नीतिकथं सरकार न्ह्यज्यानाच्वंगुलिं थुकी ग्वाहालि यायेत नं फुक्कसित इनाप यानादिल ।
प्रदेश नं. २या मुख्यमन्त्री लालबाबु राउतं मिसापिनिगु शिक्षाय् पहुँच अप्वयेकेमाःगु खँय् बः बियादिल । वय्कलं प्रदेश सरकारं शिक्षाय् मिसापिनिगु पहुँच अप्वयेकेगु कथं ‘बेटी बचाउ, बेटी पढाउ’ अभियान न्ह्याकाच्वनागु खँ न्ह्यथनादिसें प्रदेश सरकारं विपत्र, आर्थिककथं कमजोर व ल्यूने लानाच्वंगु समुदाययात शिक्षाया मूलधारय् हयेगु प्रदेश सरकारया नीतिकथं कमजोर परिवारया मिसामस्तय्त हःपाः बीकथं लच्छिइ न्यासः तका बीगु नं धयादिल ।
ज्याझ्वलय् प्रदेश २ या प्रमुख रत्नेश्वरलाल कायस्थया नं उपस्थिति दुगु खः ।
Categorized in राजनीति
