फुक्क जाःसा जक वातावरणीय अवस्थाय् सुधार हयेफइ : येँ महानगर प्रमुख शाक्य
लहनान्युज | ने.सं. ११३९ तछलाथ्व पारु (४ जुन, २०१९), मंगलवाः
वातावरणीय प्रदर्शनी व जागरणमूलक ¥याली पिथनाः येँय् ४५क्वःगु विश्व वातावरण दिवस हंगु दु ।
थ्व हे झ्वलय् फोहोर व्यवस्थापनय् आबद्ध निजी नापं गैरसरकारी संघ संस्थां येँया राष्ट्रिय सभागृहपाखें पिथंगु चेतनामूलक ¥यालि भद्रकाली, शहिदगेत, लुँहिति, न्हूसतक जूसें बसन्तपू थ्यंगु खः ।
¥यालि बसन्तपू थ्यनेधुंकाः येँ महानगरपालिकाया प्रमुख विद्यासुन्दर शाक्यं वातावरणीय प्रदर्शनीया उलेज्या यानादीगु खः । छक्वः छ्यलेधुंकूगु हलंज्वलंयात हाकनं छ्यलाः दयेकातःगु हलंज्वलं, हलंज्वलं तयार यायेगु विधि, फोहोर व्यवस्थापन यायेगु विधि, छेँ यचुपिचु यायेगु विधिलिसेंया प्रदर्शनी तयातःगु खः । प्रमुख शाक्यं प्रदर्शनीइ तयातःगु फुक्क हलंज्वलंया अवलोकन यानादीगु खः ।
अथे हे वातावरणीय प्रदर्शनी लिपा पिहांवःगु ¥यालि वंघः, असं, जमः जूसें सभागृह थ्यंकूगु खः । सभागृहस ग्वसाः ग्वःगु ज्याझ्वलय् न्ववानादिसें प्रमुख शाक्यं फुक्क जाःसा जक वातावरणीय अवस्थाय् सुधार हयेफइगु धयादिल । वय्कलं थुकी सकलसित सहभागी जुइत नं इनाप यानादिल ।
ज्याझ्वलय् प्रशासकीय अधिकृत केदार न्यौपानें बांलाक्क ज्या याइगु निजी क्षेत्रयात प्रबद्र्धन यायेफूसा जक बांलाःगु लिच्व हयेत अःपुइगु बिचाः प्वंकादिल । ज्या यायेगु शैलीइ ह्यूपाः हःसा जक न्हूपनया महसूस जुइगु वय्कलं धयादिल ।
ज्याझ्वलय् न्ववानादिसें वातावरण व्यवस्थापन समितिया कजि नापं वडा नं. १२या वडाध्यक्ष विकास डंगोलं प्रतिफल वइकथं फोहोरय् लगानी व्यवस्थापन यायेगु धयादिल ।
थ्व हे झ्वलय् वातावरण व्यवस्थापन विभागया प्रमुख हरिकुमार श्रेष्ठं लाथेपाथे फाहोर वांछ्वइगु संस्कृति न्हंकेगु नितिं कानूनी कारवाहीया प्रकृया न्ह्याकेगु धयादिल ।
ज्याझ्वलय् महानगर प्रमुख शाक्यं ‘परिवर्तन सन्देश’ नांया सफू नं पितब्वज्या यानादीगु खः ।
Categorized in राष्ट्रिय
