फुटबल छम्ह कासामियात कोरोना संक्रमण
लहनान्युज | गुंलागा १० ११४०,साउन ३० शुक्रवाः
राष्ट्रिय टिमं बन्द प्रशिक्षण याना च्वपि मध्ये छम्ह फुटबल कासामियात कोरोना संक्रमण खनेदुगु दु । अखिल नेपाल फुटबल संघ (एन्फा) नं सोमवाः व मंगलवाः निन्हु यकं ३४म्ह कासामिपिन्त कोरोना परीक्षण याःगु खः ।
उकि मध्ये छम्हेसित संक्रमण पुष्टि इपिडिमियोलोजी तथा रोग नियन्त्रण महाशाखां धाःगु दु । महाशाखां वयात गये यना व्यवस्थापन यायेगु धइगु विषय सहलह जुयाच्वंगु धका जानकारी
बिःगु दु ।
नेपालय् थ्व स्वया न्ह्यःन छम्हेसित क्रिकेटया कासामियात न कोरोना पुष्टि जूगु खः । फुटबलय् धाःसा थ्व न्हापागु पटक कासामियात कोरोना संक्रमण खने दुगु खः । थ्व स्वया न्ह्यः स्क्वास कासाया प्रशिक्षक हिरा थापायात न कोरोना संक्रमण खने दुगु खः । वयात आः होम आइसोलेसनय् तया तःगु खः ।
मंगलवाः २३ कासामि नाप २९म्हेसित परीक्षण याःगु खः । बिहीवाः २२म्ह कासामि नाप २८ म्हेसिगु रिपोर्ट नेगेटिभ वःगु खः । एन्फां छम्ह कासामि यात पुन परीक्षण यायेगु धका धाःगु दु ।
