२०८१ आषाढ ३०, आइतबार

फेडरर च्याक्वः खुसी ‘विम्बल्डन’ च्याम्पियन

लकसमान | ने.सं. ११३७ दिल्लागा ७ (१६ जुलाइ २०१७)

न्यादँ लिपा विम्बल्डन टेनिसया उपाधि स्वीट्जरल्याण्डया रोजर फेडररं त्याकूगु दु । थौं आइतवाः जूगु कासाय् विश्व नं ७ कासामि क्रोयसियाया मारिन सिलिकयात ६–३, ६–१ व ६–४या तप्यंक सेटं बुकाः उगु उपाधि त्याकूगु खः । वय्कलं थुगु उपाधि लिपांखुसी सन् २०१२ सालय् त्याकूगु खः । फेडररया विम्बल्डन उपाधि च्याक्वःगु खःसा वय्कलं थुगु उपाधिनापं मुक्कं १९गू ग्राण्डस्लाम उपाधि त्याकेत ताःलाःगु दु ।
 
 
फेडररं थुगु उपाधि त्याकेवं अमेरिकाया पिट साम्प्रास व विलियम रेनाशालिसेया रेकर्डलिसे नं बराबरी याःगु दु । उमिसं थुगु उपाधि च्याक्वःतक त्याकाः रेकर्ड तयातःगु खः । उकिया झ्वलय् फेडरर नं थःगु नां च्वय्त ताःलाःगु दु ।
 
 
अथेहे फेडररं थुगुसी हे जक मेगु ग्राण्डस्लाम अष्ट्रेलियन ओपन त्याकूगु खः ।
 
 
थ्वहे झ्वलय् ३५दँ व ११ला दुम्ह फेडरर ग्राण्डस्लाम टेनिस त्याकूम्ह निम्हम्ह ज्याथःम्ह कासामि नं जूगु दु । ग्राण्डस्लाम त्याकूम्ह दक्कलय् ज्याथःम्ह कासामि कथं किन रोजबेलया नां च्वयातःगु खः, गुम्हेस्यां सन् १९७२ य् अष्ट्रेलियन ओपन त्याकूगु खः, गुगु इलय् वय्कः ३७ दँ दुम्ह खः ।
 
 
सन् २०१४या यूएस ओपन च्याम्पियन सिलिक सन् २००० लिपा विम्बल्डन च्याम्पियन जुइगु ह्वःताः त्वःफ्युकूगु दु । 
Categorized in कासा