फोनं ख्यानाः आपराधिक लबः कायेत स्वःगु द्वपनय् प्रहरीं प्यम्हेसित येँया थीथी थासं ज्वंगु दु ।

प्रहरीं ज्वंपिंलय् नुवाकोट ककनी गांपालिकायाम्ह ३३दँया बिन्तोष सिलवाल (सुनार), रामेछाप सुनापती गांपालिका–३ याम्ह ३१दँया रामदल श्रेष्ठ (अटल) लाःगु दु । अथे हे काभ्रे तिमाल गांपालिका–५ या ५२ दँयाम्ह तिर्थमान तामाङ व चितवन भरतपुर महानगरपालिका–१३ या ४२ दँया नन्दुराज आचार्ययात नं प्रहरीं ज्वंगु दु ।

इमिसं स्वनिगः लिसें थीथी थासय् व्यवसायीतय्त फोन यानाः नेकपा माओवादी, विप्लव पुचःया पूर्व जिल्ला सेक्रेटरी व कार्यकर्ता खः धासें ३ करोड चन्दा फ्वंगु प्रहरीं जानकारी ब्यूगु दु ।

थम्हं धयाकथं चन्दा मब्यूसा भौतिक कारवाही यायेगु ख्याच्वः ब्यूगु खः ।

व्यवसायीतय् ज्या याइगु व च्वनीगु थासय् निगरानी यानाः जबरजस्ती धेबा फ्वनाच्वन धइगु सुचं वयेधुंकाः प्रहरीं उमित ज्वंगु खः ।

महानगरीय अपराध महाशाखापाखें खटे जूगु प्रहरी टोलीं उमित ज्वंगु खः ।

उमित आपराधिक लबः कायेमज्यूगु कसुर मुद्दा दर्ता यानाः येँ जिल्ला अदालतपाखें स्वन्हुया म्याद थप यासें अनुसन्धान न्ह्यानाच्वंगु प्रहरीं धाःगु दु ।

Categorized in अपराध